廣男成日都話，只要大家去街時，稍稍留意下市面吉舖、艱難搵食嘅打工仔，基本上已經可以感受到攬炒嘅威力有幾大。不過，喺「違法達義」始作俑者戴耀廷睇嚟，似乎仲覺得市民未夠慘、香港未夠「甘」。今日佢又喺《生果報》寫咗篇題為嘅文章，繼續宣揚佢嘅「流血抗爭」歪論。廣男睇完篇文，有個建議，就係請全港家長都不妨睇下呢位「法律系戴副教授」所描繪嘅景象，然後再諗一諗，係咪願意自己嘅仔女受呢種人煽惑、係咪願意香港係呢種「宿命」！

戴耀廷嘅所謂「攬炒十步」，基本上可以視為佢臆想之中，香港未來一兩年裡面，可能會發生嘅事件。簡單嚟講，包括中央、特區政府會「打壓」民主派參選人，但喺香港人「反抗之下」，民主派依然可以立法會議席過半（「35+」）；跟住就可以逼使政府停擺、特首辭職，但亦因此可能導致中央「宣佈香港進入緊急狀態、大舉拘押民主派領袖」，而香港人「抗爭更激烈，鎮壓也非常血腥，港人發動三罷，令香港社會陷入停頓」，最後就係「西方制裁中國」……大家又明唔明，戴耀廷其實究竟想講咩？

說到底 還是反中、謀「獨」

其實只要抱住戴耀廷「凡事必有政治目的」嘅態度，大家就自然睇到佢嘅狐狸尾巴。廣男認為，戴耀廷今次想講嘅第一個「重點」，就係幫盲反派奪取立法會造勢。戴耀廷想話俾大家知，如果盲反派可以主導立法會，就可以做到「好多嘢」，包括否決法案、癱瘓政府甚至逼特首辭職。第二樣嘢，就係想繼續煽動香港人（廣男認為主要係年輕人）要流血「抗爭」，面對「血腥鎮壓」，要更加「激烈地反抗」，而一切一切，就係為咗「終極目的」，即係引西方「制裁」中國。原來戴耀廷講咁多嘢，主旨都離唔開「奪權」兩個字，奪立法會嘅權、繼而奪特區嘅管治權，講到尾，又係謀「獨」！

要繼續推青年流血抗爭

講真，逢親見到戴耀廷出嚟講嘢，廣男都諗到「一將功成萬骨枯」呢句話。「功成」嘅當然係果班食人血饅頭嘅政客，而「萬骨枯」嘅就係一班聽信煽惑去送死嘅後生仔女。所以廣男又係果句，各位家長不妨去讀下戴耀廷呢篇文章，最起碼，要睇清楚呢啲政客嘅一己政治目的，再諗下點樣保護自己嘅仔女唔好成為果「萬骨枯」之一。仲有，大家唔好信戴耀廷嘅妖言惑眾，所謂嘅什麼「宿命」，唔好理佢果一套，香港自然就唔會係果種「命」，呢種「獨」上腦、立定壞心腸嘅人，你係咪仲要同佢一齊癲？！

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app