「條路你架？」呢句說話可能大家喺日常生活或者電視電影都見過，當一個人認為另一個人阻住條路，可能會問對方條路係唔係佢嘅，咁問法當然唔係想對方答係啦，而家想提醒、警告條路係公家嘅，任何人都應該尊重其他人嘅道路使用權。今日廣男見到執達吏喺金鐘清除鐵馬時，學民思潮黃之鋒同學聯常委張秀賢想出口阻止，廣男真係想問兩位，「條路你兩個大哥架？」

退一萬步講，如果佔領人士知所進退，知道自己影響到其他市民生活而自動撤離，其他人又駛乜申請禁制令要求佔領者讓路呢？法庭頒埋禁令要示威者讓路，都仲要玩嘢，到底法庭頒布嘅係法律，定佔領者自己就係法律先？！如果係前者，就應該遵守法令；如果係後者，就唔好以正義之師自居啦！

有幾句張秀賢、黃之鋒嘅歪理，廣男真係要攞嚟評價一下，唔評論佢哋有冇尊重其他人嘅心，作為大學生，講嘅嘢都唔符合常理，真係好懷疑呢兩位大學生係水平低，定係當自己係土皇帝。其中張秀賢叫執達吏解釋點解啲鐵馬阻塞到交通，真係令人費解。第一，鐵馬擺喺馬路、行人路，點樣唔阻塞交通呢？第二，如果無阻塞到交通，現場係咪「路路暢通」先？第三，如果阻塞唔到交通，法庭都唔會頒禁令啦！張先生作為中大學生會會長，講嘢可唔可以make sense啲呀？

至於黃之鋒，同佢「老友」張秀賢一樣，講嘅嘢又係令人抓爆頭，佢問執達吏點解要拆「無關重要」、「不必要」嘅鐵馬，廣男想問，啲鐵馬影響到附近嘅交通，阻住大家出入，「無關重要」、「不必要」係咪因為影響唔到黃之鋒，佢唔駛喺附近搵食，所以啲鐵馬點阻條路，都係「無關重要」、「不必要」呢？黃之鋒又懷疑執達吏咁做係有政治目的，調番轉講，有政治目的嘅係黃之鋒佢哋先啱，阻礙執達吏做嘢、先話罷課然後叫人衝政總、佔領中環等等，全部都係政治目的，仲要係想損害市民利益以達到自己既政治目的！

有理想、有使命感係好事，可惜當日揚言要保護孩子既青年人，今日已徹底變成唯我獨尊，連法庭頒令都可以視之如無物既人。諗番最初，社會、媒體對佢哋嘅盲目吹捧，唔單止無指出佢哋嘅過錯，仲壯大咗呢兩位後生仔嘅膽，唔知果啲人今日又有無恨錯難返嘅感覺呢？

原圖：hket