「我聽唔到任何人同我講，究竟我違反咗《議事規則》、宣誓誓言邊一部分」、「任何人如果認為我犯咗刑事罪行，我希望佢攞出證據」。兩句話，出自被指干犯「公職人員行為失當」罪嘅立法會議員郭榮鏗之口，出自兩辦（港澳辦、中聯辦）發聲譴責之後。好大嘅霸氣、好大嘅官威，明明有目共睹、鐵證如山嘅「犯罪經過」，郭榮鏗仲要聲大夾惡。唔係話要證據咩？！你嘅「同路人」、立法會議員朱凱廸，日前就講得清清楚楚！
政治攬炒「無得退」？
朱凱廸噚日（27/4）係媒體有篇題為《內會無得退 怯就輸一世》嘅文章，其中有段文字，廣男喺度原文照錄俾大家睇：
……是否忘記了我們為何從 10 月開始至今，堅持不讓李慧琼當上立法會內務委員會主席的原因？這裏不厭其煩再說一遍：因為民主派在反送中運動爆發後，決心不讓立法會繼續通過《國歌法》和《23 條》這些吃人惡法。內委會正是中共通過惡法的咽喉，民主派在立法會不過半，因此只能以程序握住咽喉，不讓惡法通過，並寄望於 9 月立法會選舉過半，與中共攤牌決勝。……
對於朱凱廸呢段可以視為郭榮鏗瀆職證據嘅表述，廣男認為至少佐證咗幾個事實：第一，盲反派嘅政治攬炒行動，由舊年10月（立法會會期開始）就已經開始舖排，而且係有預謀、有共識嘅集體行動；第二，絕對唔俾建制派順利主導議會運作；第三，敵視、反對事關國家象徵、事關維護國家主權嘅法例法案；第四，盲反派謀取下屆立法會「35+」（議席過半），目的就係奪權；而奪權目的，就係擺明車馬抗衡中央、國家。
亦是盲反派的瀆職證據
唔知郭榮鏗睇完朱凱廸呢段「證供」，會有咩回應呢？係咪仲要狡辯、堅稱自己「有規有矩」？如果大家認同廣男上述理解，咁又要諗一個問題：郭榮鏗嘅瀆職證據，係咪同樣可以視為成個盲反派嘅瀆職證據呢？衡量嘅標準，其實可以參照港澳辦嘅質問：佢哋係咪真心認同「一國」？擁護《基本法》、效忠特區政府？又有冇盡忠職守為特區、為市民服務？有冇違背當日就任誓詞？
大家唔好忘記，朱凱廸早前仲講過，叫香港人「要有跳落懸崖的勇氣」，仲揚言「民主派嘅議員同香港市民一齊，就等緊呢一日嘅來臨」。有冇市民想同佢哋一齊攬炒、「跳崖」，廣男就相當懷疑，但就好肯定，好多市民都等緊香港撥亂反正嘅一日！依家既然有證據在手，就請政府依法辦事吧；任何善意嘅溝通、勸告、商量，都只不過係與虎謀皮！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論