日前一則新聞引起囍雨關注。兩名分別16歲、喺黑暴運動入面涉嫌干犯重罪（包括暴動、縱火以及企圖縱火）嘅少年，原本噚日提堂再訊，但兩個人都無故缺席聆訊，懷疑已經棄保潛逃。每每睇到呢啲新聞，囍雨都有同一個感覺，就係既憤慨、又心痛。其實黑暴運動以嚟，負罪潛逃嘅青少年，又點止兩個？單單喺台灣，就有超過三百人，幾乎個個都喺寢食難安與惶恐中艱難度日……諗到呢度，可能好多人又會同囍雨有同樣嘅問題：我哋嘅下一代、香港未來嘅主人翁，究竟點解會變成咁？
呢個問題其實由來已久，社會上亦都有唔同嘅意見。囍雨見到，近日教大校董會主席馬時亨，以及教育局局長楊潤雄都分別發表咗一啲發人深省嘅見解，值得同大家分享。
品格教育的問題
馬時亨喺一個電台節目中，就提到「品格教育」嘅問題。佢希望年輕人「無論期望有多高、目的有多高尚，都不要令父母擔心」；又認為香港喺品格教育方面做得唔足夠，如果學生「只有智慧但缺乏品格，也不會是完美」。囍雨唔知道，如果兩名潛逃嘅少年，以至身處台灣嘅香港年輕人聽到呢番說話，會唔會有所觸動？囍雨就覺得，每當夜闌人靜時，佢哋不妨撫心自問，如果真係認為自己「做得啱」，點解連面對責任嘅勇氣都冇？如果自己都明知有錯，咁當初點解又要去做？依家身負重罪、過住「唔見得光」嘅日子，又有冇諗過自己嘅父母、家人心頭係咩滋味；敢做唔敢當、做咗唔敢認，咁樣嘅品格同態度，又如何去行今後嘅人生？
培養守法意識的問題
青少年品格出問題，身為師長者有冇責任？囍雨就話當然有。大家試諗下，當不斷有學校老師都煽動仇恨，甚至連培養老師嘅老師都偏激、激進，又點寄望佢哋教出守法嘅下一代？所以教育局局長日前接受媒體專訪時，就講到「培養守法意識」嘅問題，表明未來會加強價值觀及法治教育，令學生更掌握守法、尊重唔同意見嘅重要性；而除咗學校之外，另一方面，家長作為「第一身」關顧子女嘅角色，亦都更加重要，「培養小朋友需要整個社會出力，家長要關心子女，如有不妥就要及早幫助…」；全社會亦都要留心青少年有冇受他人誤導、引誘。
社會要有撥亂反正的勇氣
老實講，每當見到有學生、年輕人因為涉嫌犯法而被捕、面臨檢控又畏罪潛逃嘅事件發生，囍雨認為社會大眾唔可以再只係心痛、惋惜一輪之後，跟住又乜嘢都唔做，而係應該喺呢一刻、就喺當下，就要鼓起撥亂反正嘅勇氣！無論家長定係師長，唔好再覺得對年輕人無底線地「包容」就叫愛護，更加唔好以為對佢哋直斥其非、糾正錯誤，甚至要求佢哋承擔責任就係「殘忍」。換個角度諗，如果久而久之，我哋嘅下一代連最基本嘅做人品格、守法意識都喪失，咁先至係社會最大嘅災難，而呢個災難，最終會係年青一代自己嚟承受……
講到呢度，大家又應該諗下，果班推年輕人去違法、當炮灰嘅政客，究竟有幾可恨！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論