一向與黑暴「同行」嘅油尖旺區議會副主席余德寶，今日喺《生果報》有篇文章，批評民政專員「瀆職，打壓、閹割議會權力」，令一眾「民主派」議員嘅工作「舉步維艱」，究竟咩工作咁「艱難」？余德寶嘅例子，係盲反派嘅所謂「重組警隊」動議，受到民政專員嘅「不合作運動」影響。廣男想講，先撇開民政專員有冇權力去處理重組一個政府部門，呢樣嘢又係咪屬於區議會嘅職責範圍呢？明明自己越權，仲話人哋「閹割權力」；真正屬於區議會職責範圍嘅地區民生事務，又唔見佢哋認真花心思花時間去做，依家究竟邊個瀆職？！
以連篇歪理去越權
廣男睇余德寶篇文，佢聲稱討論「重組警隊」有逼切性嘅理據，係有所謂「太子站8.31事件、油麻地人踩人事件、理大圍攻事件」，地點都喺油尖旺、對象亦係區內居民。如果話警隊工作與民生息息相關，廣男唔反對，但區議員如果真係「為民發聲」，最起碼係咪應該擺事實、講道理呢？
論職權，退一步嚟講，就算要「重組警隊」，都唔係區議會呢個「資訊組織」嘅權力範圍，呢個動議本身就已經越權！擺事實講道理，所謂「8.31事件」，連當日「死者」都已經活生生出嚟接受採訪，就請盲反派政客唔好再講啲陰魂不散嘅大話喇！所謂「油麻地人踩人事件」，請搞清楚，已經有媒體查證，事實係當日一班黑暴違法之後，逃跑過程中有「人推人」而釀成混亂，警方拉人導致人踩人嘅講法，係盲反派嘅說法啫。至於所謂「圍攻理大」，事實更清楚，係暴徒佔據理大後大規模破壞，警方無可能唔執法。所以在情在理，根本上係區議員都有問題，仲好意思批評民政部門？
連「天眼」都拆 怕影到「手足」？
如果真係要講瀆職，廣男請大家不如又睇下更典型嘅例子，就係有油尖旺區議員早前竟然要求拆除區內用嚟預防罪惡、協助查案嘅「天眼」系統（閉路電視），大家都知「天眼」對阻嚇罪案有幫助，萬一「出事」，都有證可查，點解區議會又動議要拆呢？係咪應該解釋下！真係為「節省公帑」，定係為咗方便「同行手足做嘢」唔會被影到呢？如果真係冇咗「天眼」，區內居民嘅財產、人身安全都可能受影響，呢啲咪又係瀆職囉！
執筆之時，廣男又聽聞荃灣區議會今日開會，動議包括將區內一個休憩處改名「10.1人民抗暴紀念公園」，擺明又係類似之前西貢區議會嘅「紀念周梓樂、陳彥霖公園」嘅動議。大家應該反問，當盲反派把持嘅區議會，一個又一個淪為玩政治抹黑、人格謀殺嘅地方，咁「說好的為地區服務」呢？盲反派區議員當自己係立法會議員？定係直頭當自己係行政會議成員？
圖片來源：余德寶Facebook
請Follow我們的YouTube頻道：
下載我們的手機應用程式，收看第一手精彩內容：
評論