最近，《生果報》全力報道一則看似令人「振奮」嘅新聞，就係名為「保護傘」嘅台灣食店營業，仲有「流亡」台灣嘅香港青年攞到工作證可以做嘢；其實，有人已經講過，一班香港年輕人因為參與黑暴運動而要「流亡」台灣，有少部分人攞到工作證，可以喺台灣做「茶記」，但唔自首、唔承擔罪責就返唔到嚟香港，件事根本就唔值得「開心、振奮」！最近，廣男睇到一篇台灣報道，終於找到答案，原來無論一班「流亡」台灣嘅香港年輕人如何被美化，講到底，佢哋都只係「被遺忘」的人 …
流亡者？旅行者？
大家以為人數達300人嘅「流亡」台灣嘅香港青年喺台灣過得好？錯，完全錯！因為佢哋好多人連工作簽證、讀書簽證都無，嚴格而言，喺台灣只係「旅行者」，靠其他人接濟生活，經常活於惶惑之中。以某媒體花極大篇幅報道嘅Carol為例，佢有時根本連覺都瞓唔著，喺取得簽證之前，只可以「無止盡地等待」；其他受訪「主角」亦唔好得好多，有啲要食安眠藥先瞓得著，有啲為咗「慳錢」，一日只食一餐飯。《生果報》之前報道有人攞到工作證「開心到跳起」，大家信呢啲「喜事式」報道代表到「流亡」台灣嘅香港青年？廣男唔信囉！
瞓唔著，要食安眠藥，唔敢熄燈瞓，瞓覺時會喊，呢啲全部都係「流亡」台灣嘅香港年輕人嘅悲慘「寫照」，呢啲亦可以話係參與黑暴運動嘅代價；參與黑暴，根本就唔值得亦唔應該被「英雄化」，如果參與黑暴係「好事」，呢啲「流亡」台灣嘅年輕人，點解依家會咁痛苦？
《生果報》高調報道有食店喺台灣開張，專係比「流亡」台灣嘅香港青年喺果度工作、謀生，廣男近乎日日都睇《生果報》，但幾乎未見到《生果報》有詳細報道過啲「流亡」台灣嘅香港青年慘況；而呢啲慘況，先至係香港青年「流亡」台灣嘅真實寫照，流落異鄉，台灣政府喺大選過後對「流亡者」愛理不理，「流亡」青年被遺忘 … 唔好忘記，佢哋本身應該讀緊書、為事業打拼，依家？因為抗爭，所謂「違法達義」，就有家歸唔得。
不要再荼毒青年
廣男喺呢度，懇請本港嘅盲反派政客，唔好再荼毒年輕人，講到抗爭有幾偉大、「英雄」，你哋可能從中得到政治利益，但一切一切，係用香港嘅年輕人，用佢哋嘅前途、淚水換返嚟 … 夜闌人靜，午夜夢迴之時，你哋無愧疚？瞓得著咩？
請Follow我們的YouTube頻道：
下載我們的手機應用程式，收看第一手精彩內容：
評論