盲反派元老李柱銘因涉嫌「參與未經批准的集結」等罪名，上星期被警方依法拘捕（目前已保釋）之後，日前接受外媒採訪，唔使囍雨多講，大家都可以預計到，佢嘅「主旨」又係攻訐中央政府「違法《基本法》承諾、干預香港事務」等等，然後仲呼籲外國政府「有道德義務替香港人民發聲」。囍雨第一句就要問，喺盲反派嘅邏輯入面，既然中央機構對自己國家嘅特區事務發聲，都叫「干預」，咁點解其他國家又可以對香港發聲，李柱銘反而覺得冇問題、唔叫「干預」呢？

對於李柱銘嘅長篇大論具體講咗啲乜，囍雨就唔喺度複述喇，但有幾個問題必須講清講楚！例如李柱銘講到「基本法22條明文規定中央各部門不得干涉香港事務」、「中聯辦是個什麼樣的機構？」、「完全理解香港年輕世代采取比較暴力的示威手段」、「願意去坐牢，因為我相信正義是在我這一邊的」云云。

中聯辦、港澳辦都不是「部門」

囍雨想講，基本法第22條當然重要，但李柱銘點解又唔講下，基本法仲有第一條，講明香港係中國不可分離嘅一部分；又唔講下仲有第12條，香港特區直轄於中央人民政府？作為資深大律師，李柱銘睇法律，唔係淨睇「一條」啊？！至於李柱銘問中聯辦係個咩機構，不如等囍雨同大家簡單介紹下。

簡單而言，中聯辦屬於國務院嘅派出機構；而港澳辦，係國務院嘅辦事機構，兩者都冇獨立行政管理職能，亦冇政策制定權，因此並非《基本法》第22條所指嘅「部門」。兩辦嘅行為，直接歸屬國務院本身。因此兩辦就特區事務發聲，根本唔存在所謂「干預」、違反《基本法》之說。舉個例子，政府問責官員係中央任命，如果做得唔不好，中央有權解僱佢，唔需要特首提名，呢種行使權力唔係「干預」；至於立法會，係根據《基本法》設立嘅機關，雖然立法會議員唔係中央任命，但好似郭榮鏗咁瀆職，中央冇辦法解僱佢，但發聲譴責就完成正當，亦都係權責所在！

打砸搶燒、殺人放火都「完全理解」？

至於李柱銘講到「理解香港年輕人為何憤怒」，又係另一個大是大非嘅問題！李柱銘甚至話，如果自己依家係大學生，「也有可能加入他們…」，究竟咩意思？係咪想話俾大家聽，對於暴徒打砸搶燒、殺人放火、襲警、私了市民呢啲違法行為都「完全理解」、甚至如果自己後生都可能「做埋一份」？但佢一邊「理解暴力」，一邊又話自己「反暴力、永遠唔會訴諸暴力」，係咪有矛盾呢？一個法律界人士咁講，囍雨同市民就完全唔理解、完全唔接受喎！

依家李柱銘自己都被拘捕、面臨檢控，但佢就講到好似坐監好正義咁款，請搞清楚，問題重點在於，李柱銘等15人依家係涉嫌犯法！如果犯法都「正義」，不如請李柱銘以至盲反派都好好「教育」下自己啲仔女，叫佢哋都出嚟「正義」下喇！

請Follow我們的YouTube頻道：<p><a href="https://bit.ly/2kgU8qg"target="_blank">https://bit.ly/2kgU8qg</a><br></p>

下載我們的手機應用程式，收看第一手精彩內容：<p><a href="https://www.speakout.hk/app" target="_blank">https://www.speakout.hk/app</a><br></p>