港台醜聞事件簿，本「簿」越積越厚！舊年11月，港台播出嘅評論節目《左右紅藍綠》，據報係教育大學講師嘅主持蔡俊威喺節目當中煽動仇恨、抹黑警隊，並被裁定其有關煽動仇恨、資料不真實嘅投訴成立，通訊局向港台發出嚴重警告；商務及經濟發展局局長邱騰華就認為，事件性質嚴重，港台必須就裁決盡快作出正面和負責任嘅回應，包括全面檢討其節目編輯和製作嘅機制。廣男評論事件，就比較直白或者直接一啲，剩係想問一句，港台有冇人要為事件負責、引咎辭職先？

為何會批准評論出街？

對於蔡俊威喺《左右紅藍綠》講過啲咩，恕廣男唔幫佢一一重述喇，但想指出一點，就係蔡俊威竟然借「外國記者」把口，抹黑警方比ISIS（伊斯蘭國）更恐怖，近乎「無血性、無道德」。講到呢度，廣男先唔評論蔡俊威呢個人，反而想問一句，點解港台嘅製作人員包括節目監製，會俾呢段抹黑、仇恨言論播出街呢？

成件事，再講咩檢討節目、製作機制等等，老實講廣男覺得都唔足夠！簡簡單單，依家港台有節目抹黑警方為ISIS，節目出咗街，有人投訴咗，投訴亦成立咗，港台邊個問責？係節目監製或者導演？對上一層嘅管理人員，抑或係由廣播處長梁家榮問責？尤其係梁家榮，佢作為港台嘅總編輯，經過咁多事件，點解佢好似完全無責任咁？難道所謂總編輯，有權利每個月出廿幾萬元薪水，但有事又唔駛孭飛？

港台要有人問責！

講返港台醜聞事件簿，之前《頭條新聞》對警方作出不實評論、指控，節目《The Pulse》間接地將台灣視為「國家」，又有《台灣故事III》直頭用「兩國」形容台灣同其他國家嘅關係；一個令人非常不解嘅地方係，連埋今次《左右紅藍綠》節目被投訴而且投訴成立（當然計正係《左右紅藍綠》事件發生先，只係投訴最近成立），港台完全無人需要負責？咁港台同「無王管」，有咩分別？

社會不斷有聲音要求港台人員就不當節目左右紅藍綠，甚至要求廣播處長梁家榮引咎辭職，其實唔係無道理；廣男仲想講，發生咁多事，大家有冇見過梁家榮就呢啲事件公開道歉？好似無喎！係咪佢當咗港台係佢自己嘅部門、係盲反派橋頭堡，所以做咩都唔需要被監督？廣男真心想知道，梁家榮係咪已經變咗反政府「骨幹」！ 

圖片來源：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app