犯法嘅人，無論係邊個，都應該承擔法律責任！日前警方果斷採取行動，拘捕《壹傳媒》老闆黎智英、資深大律師李柱銘等15名盲反派政客，罪名包括「組織未經批准的集結」 和 「參與未經批准的集結」。對於一眾盲反派政客「落鑊」，廣男覺得係法理之所在，香港作為法治之區，絕對無「刑不上盲反派」呢回事，無論係傳媒老闆、資深政客，有咩身份、有咩目的都好，犯法就要拉，就係咁簡單！如果有名人政客犯法而有特權唔被拘控，呢啲又係唔係法治？

盲反派早料到法律後果

當盲反派媒體、政客不斷高呼15名政客被「打壓」、「政治檢控」之時，廣男首先要問一個問題，佢哋係咪唔知自己行為涉嫌違法，極可能要因此而負上刑責呢？答案顯然唔係，就以去年10月1 日國慶日為例，其實警方已經以安全為由拒絕民陣嘅遊行申請，但之後民陣副召集人陳皓桓、工黨李卓人、社民連梁國雄同民主黨何俊仁以「個人身份發起遊行」，仲曾經表明行動有法律風險，已有心理準備事後會被警方拘捕。有人明知有法律風險，明知可能被捕，即係知道行為極可能涉嫌犯法，依家被捕、被撿控可以話係「求仁得仁」，何來打壓呢？

更離譜嘅地方係，李柱銘被捕後見記者，竟然稱「我所作所為，一啲都無後悔，我感覺到驕傲，終須有機會同一班優秀嘅香港年青人，可以繼續行我哋呢條民主路」，即係涉嫌犯法仲要感到驕傲？廣男必須強調，就係因為呢種「違法達義」嘅思想美化罪行，令到好多年輕人走上違法嘅「不歸路」，但好多年輕人無李柱銘咁「好彩」，因為好多年輕人係被告暴動、縱火甚至意圖謀殺，有啲罪可被判終身監禁，李柱銘就算被告「組織及參與未經批准的集結」，請問會唔會坐一世監呢？如果係李柱銘自己或子女被控意圖謀殺，廣男相信李柱銘唔會講得「咁輕鬆」！

從不見盲反派兒女「違法達義」！

今日，《生果報》有篇題為《與李柱銘同行抗暴的驕傲》，廣男實在好奇，既然同行「抗暴」係咁值得「驕傲」，點解大家都唔見李柱銘個仔出嚟「驕傲」一下？仲有黎智英嘅子女呢？有冇同黎智英出嚟一齊「抗暴」？唔好話呢兩個盲反派重量級人物，廣男幾乎未見過有盲反派政客嘅兒女出嚟「抗暴」，更無見過佢哋嘅子女要「流亡」台灣。點解會咁？因為呢啲「高危活動」，盲反派政客梗係唔會煽動自己子女去做，而係「鼓勵」他人子女去做！依家數以百計嘅香港年輕人「流亡」台灣，以千計年輕人喺香港被捕甚至被撿控，李柱銘、黎智英諗住點幫佢哋？同佢哋講「案底令人生更精彩」？定係話俾佢哋聽「坐監有益」？ 

https://bit.ly/2kgU8qg

https://www.speakout.hk/app