學聯上京被拒，可以話係跟足劇本做，先話要求上京見京官，然後被拒入境／登機，跟住同記者講中央唔肯溝通，香港自主都會被慢慢沒收等等。為乜要咁做，好簡單啫，就係要繼續keep住佔領行動團火，一來等啲佔領者見到仲有嘢做緊唔好散水，二來佔領咗幾十日，「佔中」發起人無嘢爭取到，都要畀人睇到佢哋有做嘢。

劇本第二個可能，就好似肥佬黎所講，如果學聯上京被捕，到時可能好多人上街，學聯三子仲會變埋英雄添；而家佢哋連飛機都搭唔到，其實已經係一個唔錯既結局，萬一佢哋上京又入到境，但又造出冒犯到京官既事，唔好話對佔領行動無幫助，對學聯三子都唔好。

可能有人會覺得廣男講既嘢唔啱聽，但廣男講既，係見到既事實。由佔領行動開始，佔領者包括學聯，佢哋做既嘢，係100％為政改好？定係佢哋自己都有自利？又或者佢哋自己都畀果種被吹捧既「榮譽」所蒙敝，行動只求浪漫、欠奉實際？

首先以罷課名義衝擊政總，之後同政府進行自己毫不讓步既談判，又發表對國家主席習近平既公開信，而家仲要上京；廣男想知道，學聯到底有冇諗過點樣係可行既情況下同政府再談判，或者喺咩機制下會集體離場。如果識得審時度勢，學聯唔單只要知道點樣爭取成果，更加要明白佔領行動曠日持久，佢哋自己都會民心漸失。

呢排廣男同朋友飯聚，發覺有唔少本來支持「佔中」既朋友，都開始對事件保持中立態度，甚至認為佔領者應該退場，畢竟就算理念有幾崇高，攞其他市民既利益做籌碼，市民又點會支持呢？但係，佔領行動持續落去，都唔係最壞既情況，如果學聯、學民思潮又將會有咩新行動，仲要帶埋啲學生去做，後果會點呢？

原圖：bastillepost