今日，囍雨喺《生果報》睇到一篇「感覺」令人好「鼓舞」嘅新聞，就係有香港人發起，喺台灣搞咗間專比「流亡」青年工作嘅餐廳，有因為參與黑暴而「流亡」嘅香港人，仲因為攞到「工作證」可以去工作而「開心到跳起來」。開心都跳起？咁囍雨想問下，呢啲「流亡」台灣嘅香港人或者香港青年，佢哋可以喺台灣工作或者讀書，但佢哋唔自首、投案的話，可以返香港嗎？一世「流亡」台灣？《生果報》呢個「頭版報道」，好似講緊「喜事」，但係咪「真‧喜事」，囍雨好有保留囉！

重點：「流亡者」不回港？

對於呢篇《生果報》非常重視嘅報道，大致係講喺舊年嘅黑暴運動，有一批年輕抗爭者「被迫流亡」台灣，部分人晚晚發惡夢，活在焦慮同憂鬱當中，直至最近，由香港律師黃國桐發起、俾「流亡者」在台灣工作嘅餐廳「保護傘」，獲得台方發出首張工作證，抗爭者可以合法在台工作，「保護傘」可正式營運，「流亡者」如釋重負云云。講到呢度，大家都會感覺到，《生果報》嘅重點，係「流亡者」可在台灣工作，係好事；但囍雨認為，重點其實係佢哋部分人就算可以喺台灣工作都好，如果唔自首，佢哋係咪永遠都唔返嚟香港呢？

香港有有心人或者關心台灣「流亡者」嘅人搞間餐廳「幫」呢啲「流亡者」，囍雨唔會懷疑佢哋係真心對待「流亡者」，但囍雨認為，呢件事所意味嘅，係咪呢班「流亡者」要永遠流落異鄉呢？佢哋係咪要一世離鄉別井？係咪一世都唔返自己真正嘅屋企？心中只能掛念，而不可回港？呢啲問題，囍雨相信一直纏繞喺「流亡者」腦海，囍雨亦要問一句，何必呢？

政客煽動 青年「行動」

如果無政客唆擺，近年不斷話俾人聽抗爭係正確，甚至犯法都「無問題」，可能今日都唔會出現呢啲「流亡者」，囍雨亦唔知道，呢啲人未來幾十年要點過；囍雨請大家留意一點，呢啲縱暴、煽暴嘅政客，可能到今日依然喺香港「嘆世界」，有啲專業人士已經搵夠錢「上岸」，有啲就喺議會每月出緊十萬元酬金，約滿再攞67萬元酬金，而「流亡者」呢？撇除唔自首、投案就好難返香港，佢哋好彩嘅，都可能只係能夠喺台灣做「茶記」？開心？「流亡者」可能攞到工作證果刻真係開心，只係囍雨唔知道，呢種「開心」可以持續幾耐 …

選擇一世逃避，內心就要接受一世煎熬。「流亡者」唔能夠回到過去，但到今日依然有選擇，係要流落異鄉一世，定係要返香港做個光明正大嘅人，全在「流亡者」、抗爭者嘅一念之間。囍雨唔憎恨呢啲年輕人，但喺佢哋背後興波作浪嘅政客，就極度痛恨！

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app