喺剛過去嘅星期日，廣男同家人食完下午茶，特意走到咖啡店（基於疫情近排好少去喇）買杯咖啡，然後返屋企等睇許冠傑嘅演唱會直播，由於家中老少都係許冠傑粉絲，所以Whatsapp亦不斷響起，有家人話要點唱某首歌，有家人甚至擔心睇睇下會有廣告「彈出嚟」；喺短短一個鐘嘅「歌神」演唱會，我哋聽到好多金曲，例如《學生哥》、《沉默是金》等等，喺疫情之下感覺確實係Warm嘅。
奇就奇在，之後竟然有盲反派政客連許冠傑都要「抽水」，元朗區議員張秀賢稱「而家聽許冠傑啲歌，真係不合時宜」，「香港眾志」羅冠聰甚至借機宣揚「反港反中」訊息；對於許冠傑嘅演唱會，唔鍾意聽，可以唔聽，覺得唔啱聽，都無問題！不過，世上總有知音人，如果張、羅覺得許冠傑啲歌「不合時宜」，而好多人爭住聽，其實係咪呢兩位政客做嘅嘢「不合時宜」，剩係識搵嘢嚟抽水呢？
網民叫羅冠聰返美國？
多得網民提醒，叫羅冠聰返美國，廣男先記得「熱愛美國」嘅羅冠聰，啱啱先捨棄俾機會佢去美國進修嘅「主子」，急急返咗嚟香港「避疫」；其實只要睇下網民反應，就會知道羅冠聰等人「抽許冠傑」水，佢哋嘅支持者有咩睇法，例如喺羅冠聰自己Facebook專頁，有人就叫羅冠聰「放下顏色眼鏡去睇」；喺張秀賢Facebook專頁，有人直頭同張秀賢講「我真心想同你割…我唔明白你呢種人點解一D尊重無用，好失望…」。點解喺呢兩位政客嘅Facebook，啲支持者都要批評佢哋，因為佢哋「反政府」反上腦，連人哋出嚟唱下歌，傳遞下正能量都要「抽水」囉！
香港就是靠上一代打拼
可能因為羅冠聰、張秀賢「太年輕」，所以無乜聽過許冠傑啲歌，唔緊要，不過如果連對他人嘅基本尊重都無，覺得政治大過一切，咁就錯晒啦！以許冠傑為例，佢今次除咗自己出嚟唱歌，仲有捐錢俾某琴行受疫情影響嘅工程人員，羅冠聰、張秀賢又做過啲咩呢？一個就成日批評港府，但有事就即刻縮返嚟香港避疫；一個無視「限聚令」，參加幾十人嘅「酒吧聚會」仲要擺出一副「我都有參與，又如何」嘅樣子？恕廣男坦白地講句，羅冠聰、張秀賢無資格借許冠傑演唱會「抽水」，亦無資格去質疑香港人嘅品味！
可能羅、張認為許冠傑啲歌「不合時宜」，但廣男最後要指出，香港之所以有今日，就係靠許冠傑果一、兩代人刻苦打拼、努力換返嚟，所以先至會有今日嘅香港！如果香港係靠羅、張呢啲政客去塑造出嚟，對唔住，恐怕大家未見到香港有出路，香港人已經被「攬炒」，餓死咗啦！許冠傑首《浪子心聲》入面有幾句歌詞：「無知井裡蛙，徒望添聲價，空得意目光如麻，誰料金屋變敗瓦」，就係羅冠聰、張秀賢嘅寫照！
原圖：《許冠傑 2020 同舟共濟網上演唱會》主辦方圖片
請Follow我們的YouTube頻道：
下載我們的手機應用程式，收看第一手精彩內容：
評論