公民黨立法會議員陳淑莊、公民黨成員林瑞華等聚眾40人參與「酒吧開會」，事件繼續發展，鑑於事件發生至今接近半個月，但陳淑莊等人竟然到依家都仲未向公眾道歉，有社會人士最近就發起網上聯署，要求陳淑莊、林瑞華等人公開道歉、自首，以及陳淑莊要引咎辭職。囍雨就覺得，呢件事絕對係未解決，因為陳、林喺本月2日「酒吧開會」當晚，就係立法會飲食界功能組別更新選民資料嘅最後限期，呢班人極可能一邊飲酒、一邊傾選舉，如果涉及有人已經宣布會參選，又「埋單請飲酒」，咁分分鐘仲係犯法添！
謎團未解 政客「側側膊」
對於陳淑莊參與人數達40人嘅「酒吧開會」，囍雨覺得成件事最令人質疑嘅，係陳淑莊、林瑞華同元朗區議員張秀賢等人聚會當晚，係立法會飲食界功能組別更新選民資料嘅限期，張秀賢喺事發前幾日又喺元朗同林瑞華疑似做選民登記；呢班人喺呢段時間聚埋一齊，其他人絕對有理由懷疑，當晚所謂傾「業界嘢」係假嘅，傾選舉先係事實，而囍雨觀察相關新聞到今日，陳淑莊、林瑞華等人到今日都無正面應過種種質疑，呢個「酒吧開會」，違法味况甚濃！
涉及選舉 眾人違法？
可能大家會覺得，就算傾選舉都唔係好「大件事」啫，但囍雨要指出，呢件事真係非同小可，分分鐘可能有人涉嫌違法。老實講，林瑞華早兩日接受媒體報道，都有報道指出過佢「近日表示積極考慮參選立法會飲食界功能組別」，如果佢一早向身邊人講明自己會參選，如同佢已經宣布參選；而佢哋一行人若果喺「酒吧開會」當晚再傾佢嘅選舉工作（種種表象睇嚟呢個可能性唔低），有人飲酒，有人埋單請人飲酒，咁可能就有人已經涉嫌違反《選舉（舞弊及非法行為）條例》，係可以坐監嘅刑事罪行，大家話係咪大問題呢？
事件發展到今日，陳淑莊涉嫌違反「限聚令」然後唔道歉、唔辭職；林瑞華作為當晚「疑似」主角，至今都無向外解釋過當晚實際做過啲乜，包括有冇傾選舉，有冇請人飲酒等等。巧合嘅係，兩個「出事」嘅主角，都係公民黨嘅政客，囍雨喺度懇請向來鍾意「高舉法治」嘅公民黨一眾政客，快啲叫陳淑莊、林瑞華自首啦！政客犯法，一樣要承擔罪責！
原圖：林瑞華fb
請Follow我們的YouTube頻道：
下載我們的手機應用程式，收看第一手精彩內容：
評論