特區政府昨日史無前例地宣布過千億元嘅紓困措施，而特首、司局長等官員亦會喺未來12個月減薪一成，回應咗市民嘅部分期望同訴求。眼見特首都減人工，好多人都提出一個問題，就係黑暴運動以至疫情至今仍未「動過分毫」嘅盲反派議員，佢哋幾時先願意、提出減自己人工呢？打從黑暴運動至今，佢哋拉布、縱暴同玩「攬炒」，如果去到今日依然人工「不減分毫」或者唔捐人工，繼續一邊逗住份高人工又一邊搞事，咁就未免太便宜佢哋喎！
建制派早有行動 盲反派無動於衷
講開議員減人工、捐人工，其實早喺政府官員有所行動前，唔同嘅建制派議員已經相當自覺，例如民建聯一眾立法會議員，就宣布咗會捐出一個月人工共300萬元幫助喺疫情下失業同有即時基本生活困難嘅人士；工聯會五名立法會議員，亦捐出一個月薪酬用嚟成立「緊急失業慰問基金」。最近，實政圓桌嘅立法會議員亦表示願意捐出議員年薪一成。基本上，部分建制派議員知道疫情嚴峻、市民艱苦，都主動提出捐人工或者減人工，點解盲反派至今依然「未聞樓梯響」？
老實講，如果你問廣男，廣男唔單止覺得盲反派議員應該減人工或者捐人工，佢哋自去年黑暴運動至今，喺議會內拉布、拖累到民生工程等撥款通過；喺議會外又縱容黑暴運動，甚至響應支持者所謂嘅「攬炒」行動，對議會以至香港可以話有破壞、無建設，單單係減少少人工或者捐一個月人工，絕對唔足夠！廣男建議，如果佢哋尚有半點羞愧之心，就喺疫情同黑暴結束前減五成人工（最好應該唔好收人工）！而除咗盲反派立法會議員，區議會都應該減人工，尤其係果啲一邊領取公帑一邊拒絕服務部分居民嘅盲反派議員，更加唔好旨意可以「側側膊，唔多覺」！
一邊破壞、一邊支薪的「筍工」
有人就形容，做盲反派議員猶如做天下間最大嘅「筍工」，因為原來有破壞、無建設一樣可以「高薪厚祿」；大家真係要追問下盲反派嘅立法會議員、區議員，依家香港俾佢哋支持嘅黑暴運動「成功攬炒」，佢哋唔係仲係「無表示」、領薪水呀？
原圖：大公
請Follow我們的YouTube頻道：
下載我們的手機應用程式，收看第一手精彩內容：
評論