歌仔有得唱，「共赴患難絕望裡緊握你手，朋友」。曾幾何時，呢句歌詞可以用嚟形容民主黨成員林子健爆出「被擄」事件後，黨內一班「兄弟」嘅即時表現。不過嚟到今日，「人生如夢，朋友如霧」可能先至係林子健內心嘅真實寫照。點解咁講？高等法院噚日就林子健干犯「明知地向警員虛報有人犯罪」，駁回林子健上訴，裁定即時收監。廣男留意到，當日第一時間神色凝重、陪同林子健開記招嘅李柱銘、何俊仁、李卓人、李永達、林卓廷等民主黨老中青三代，噚日就統統不見影蹤，剩番林子健孤獨地面對監牢日子；昔日被高捧嘅「民主鬥士」，如今就被同一班民主黨嘅兄弟所唾棄，既諷刺、又唏噓。
廣男睇到，噚日高院頒下裁決之後，林子健仲寫咗篇「告民主同路人及傳媒書」，大概意思，就係一方面控訴裁決不公、係「冤獄」，一方面仍然堅持自己係「受害者」，直頭講到自己呢兩年「猶如人間煉獄」，「換來鐵窗生涯…仍如在夢中，無法進入現實」。仲有報道提到，林子健噚日被收押時，隨即就報稱自己不適，結果要送院治理。對於林子健嘅種種慘痛，廣男都係果句：早知今日，何必當初？但從林子健自己而言，真正「最痛」嘅，究竟係入獄，定係被黨友唾棄呢？呢個答案，可能只有佢自己先知，大家可以睇到嘅，就係依家又有邊個仲同佢「同路」？
當初風頭「一時無兩」
回想當初，一個看似好有說服力嘅「釘書釘」畫面、一個似層層嘅「被強力部門跨境擄走」故仔，成功吸引全城關注，又有民主黨老中青三代「重量級」人馬陪同現身，林子健嘅風頭可以話「一時無兩」，之但係隨住劇情發展，大家同步見到嘅，係民主黨「快疾無倫」嘅變臉水平。尤其係林卓廷，廣男冇記錯嘅話，當初林卓廷仲一路陪伴林子健左右，陪住開記招、炮轟政府，仲陪埋去醫院，就算林子健之後被踢爆，林卓廷都依然「不離不棄」…但再睇下今時今日，林子健被定罪、上訴失敗，昔日嘅「好兄弟」，全部不見了。廣男似乎未曾聽過有報道提過林卓廷上庭撐兄弟，亦都唔見林子健嘅感言有感謝過林卓廷。本來好好嘅兄弟，依家就形同陌路...呢啲，係咪就叫「現實的政客」呢？
有無其他人涉案？
隨住林子健入獄，事件可以話告一段落，不過廣男仲有個疑問，就係有沒有其他人涉案呢？尤其當日陪同林子健開記者會嘅果幾位，乃至之後陪住林子健搞上訴個許智峯，佢哋有沒有涉嫌教唆他人「明知地向警員虛報有人犯罪」呢？如果有，佢哋又係咪涉及犯罪？當然，喺呢個階段，上述一切都只係廣男嘅疑問，呢班人絕對唔會自己出嚟同大家交代，因為要抽嘅水、要做嘅戲已經完成。所以林子健唔使有咩「諗唔通、放唔低」，要怪，只能怪自己，有林卓廷咁人格卑劣嘅「兄弟」、有民主黨咁「現實」嘅同路人，可能就係自己一生最大嘅錯誤。廣男建議林子健喺監獄嘅日子，不如唱番句「人生於世上有幾個知己」嚟安慰自己，然後「孤身走我路」啦！
請Follow我們的YouTube頻道：
下載我們的手機應用程式，收看第一手精彩內容：
評論