一波未平，一波又起！之前因為《頭條新聞》對警方作出無根據嘅評論，而被各界狠批嘅港台又有醜聞，其英文時事節目《The Pulse》日前訪問世界衞生組織官員時，節目主持人竟然問世衞會唔會俾根本唔係主權國家嘅台灣加入世衞，商務及經濟發展局回應事件時直指節目有違一個中國原則，更指明「廣播處長作為香港電台的總編輯，必須對此負責」。囍雨覺得件事其實好簡單，港台一而再出現問題，作為廣播處長嘅梁家榮，直接問責，引咎辭職就得喇！

港台還要狡辯！

根據傳媒報道，香港電台發言人回應事件，稱節目主持提及台灣時，係以地方（place）嚟形容，本身無任何取態，而港台審視全集內容後，認為該集節目並無違反「一國兩制」原則，亦無違反《香港電台約章》；換句話講，港台又係一味狡辯，明明有錯，照樣扮「無錯」，扮無違反港台《約章》。

對於港台稱自己或者節目主持並無違反原則，囍雨真心想問下，中國咁多省或者地方抗疫工作都做得相當好，點解節目主持個個中國地方都唔問，唯獨係要問台灣可唔可以加入世衞呢？問得呢個問題，客觀效果就係港台認為或者暗中認同台灣有「國家地位」，變相認可「台獨」，呢個唔係一般記者提問咁簡單，背後直頭係有埋預設立場！

如果單純係今次嘅提問「台灣加入世衞事件」，大家可能仲會覺得港台只係一時疏忽，但無耐之前，港台《頭條新聞》基於無事實根據嘅資料對警方作出不實指控，港台一樣堅稱「自己無錯」，當時已經有聲音要求梁家榮問責「下台」，依家一波未平，一波又起，梁家榮如果今次又唔駛負責，咁港台呢個公營廣播機構，廣播處長呢個「公務員」，就會變相成為「無王管」，可以為所欲為。

梁家榮要負全責！

廣播處長作為港台嘅總編輯，對於港台嘅節目、評論一概都要負責，絕對唔係發個聲明，話節目「無問題」或者話節目無違反《約章》就可以蒙混過關；由《The Pulse》播出到今日已經有一段時間，囍雨睇新聞似乎仲未見梁家榮本人回應過事件。同《頭條新聞》事件一樣，港台無檢討、無道歉兼無反省，梁家榮本人係咪都係「台獨」分子？係咪都係反政府、反警察嘅「中流砥柱」？想一邊領取公帑，一邊包庇反中反港言行？對唔住，呢個世界無咁便宜嘅事！ 

原圖：rthk

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app