由舊年修例風波開始，社會就出現一股「攬炒」歪風，開頭係一啲反政府人士、網民聲稱要「攬炒」，叫下叫下，連盲反派政客都加入「攬炒」行列，早排有公民黨開記者會揚言要否決所有政府法案、財政撥款，到日前，本土派立法會議員朱凱廸都撕破肚皮，喺立法會高調宣稱「不怕財政懸崖 擺脫財政綁架」，話香港人「要有跳落懸崖的勇氣」。講真，想跳落懸崖其實唔難，但囍雨唔該朱凱廸要跳，就自己帶埋班助理跳先，香港人唔想死，亦唔想被有政治目的嘅政客「攬炒」！
好快會有跳崖一日？
對於政府提出嘅財政撥款要求，朱凱廸形容為「財政綁架」，仲話我哋（香港人）要有跳落懸崖嘅勇氣，就算唔係今日，都好快嚟到呢一日，揚言「民主派嘅議員同香港市民一齊，就等緊呢一日嘅來臨」。對於朱凱廸嘅豪情壯語，囍雨想問朱凱廸一句，你想跳崖啫，但你點可以代表香港人，話香港人都等緊「跳崖的一日」呢？
老實講，經歷大半年黑暴運動，好多商戶、市民，已經遍體鱗傷，囍雨睇新聞，幾乎日日都見到香港「被攬炒」嘅新聞，一時就係商戶捱唔過黑暴要結業，一時就係市民失業，簡單嚟講，就係香港人就嚟甚至已經無飯開；朱凱廸喺呢個時候仲話叫香港人同政府一齊跳崖，佢似乎唔係想癱瘓政府，而係想香港人做政客「陪葬品」多啲喎！
請朱凱廸先放棄議員津貼
其實要跳崖、「攬炒」，一啲都唔難，既然朱凱廸咁想跳崖，囍雨請佢自己先放棄議員嘅豐厚薪酬、津貼，同埋放棄政府提供嘅所有議員辦事處營運津貼，真正感受下咩叫無錢、無飯開、被「攬炒」；一個每年領取超過一百萬元津貼、幾年辦事處總開支超過一千萬元嘅立法會議員，一邊叫「攬炒」，但另一邊繼續享受高薪厚祿，即係叫人去死，自己就繼續嘆世界啫！
朱凱廸呢種政客，大家可以用陰毒，亦可以用自私去形容佢，因為佢自己領取公帑，其他人嘅死活，根本就唔喺佢以至其他盲反派政客嘅考慮之內；如果朱凱廸尚有半點骨氣，請你先「攬炒」自己、示範跳落懸崖，唔好推人去死、自己就繼續風流快活。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論