處於政治「亂流」之中嘅香港，可以話係「無奇不有」，基本上乜都可以扯落去政治層面拗一餐。就好似油尖旺區議會早前開會，通過議案要求政府拆除、並中止更新西洋菜南街（前旺角行人專用區）嘅天眼系統，但民政處以天眼系統可阻嚇高空擲物、中止項目會浪費公帑等理據，拒絕執行區議會嘅決議，而當區民主派區議員就斥責處方「漠視區議會決定」、「會積極考慮提出司法覆核」。囍雨真心唔明，處方嘅理據有咩問題呢？一個天眼系統，都有得司法覆核？講真，依家全城抗疫，區議會唔去專心研究下點幫街坊防疫，反而花咁多精神、時間去「關心」天眼？囍雨真係要問句，當中係咪有咩古怪啊？！

囍雨有此質疑，事緣其實更新上址嘅天眼系統嘅決定，係喺上屆由建制派主導嘅區議會時期就已經拍板，包括將影像解像度升級至4K高清，同時同意警方可就任何刑事案件提取錄像以作調查用途等。但嚟到現屆由盲反派把持嘅區議會，就將之前嘅一切推翻嗮，油尖旺區議會主席林健文嘅講法，係更新天眼系統後每年維修要30幾萬元，所以「停工更划算」；而副主席、公民黨余德寶就話擔心依家「警權過大」、會提取天眼片段作「其他用途」。咁問題嚟啦，依家究竟係成本問題？定係呢班盲反派議員唔想警察「睇到太多嘢」啊？尤其依家黑暴咁猖獗，趁火打劫嘅罪案又咁多，如果冇咗天眼，該區嘅治安係咪又少咗一層保障呢？請盲反派議員講清楚啲好喎！

不想暴徒「入鏡」？

大家睇番民政處嘅回覆，當中有一個好重要嘅信息，就係天眼系統可以阻嚇高空擲物案件，囍雨就話，其實天眼對其他罪案同樣有阻嚇作用，例如盜竊、行劫、縱火，警方都可以透過天眼系統「按圖索驥」；即使一宗交通意外，警方亦都有證可查。但依家班盲反派就話要拆，咁係咪連阻止罪案、調查案件都要受影響呢？咁區內市民嘅生命同財產安全又點樣得到保障先？囍雨諗到嘅另一個更大問題，係過去大半年，油尖旺一帶都不時成為黑暴運動嘅主戰場，黑衣人暴力打砸搶燒、暴力傷人嘅事件經常發生，囍雨實在要質疑一句，班盲反派議員咁關心天眼問題，係咪驚天眼影到黑暴作亂呢？依家不惜透過司法覆核都要拆天眼，係咪想「保護」、包庇班「同路人」唔好被影到，等佢哋冇「後顧之憂」地為所欲為呢？

心中有鬼的政客

如果囍雨嘅質疑成立嘅話，咁大家真係要加倍小心，因為呢個意圖背後，其實仲有個潛藏嘅前提，就係班盲反派政客相信黑暴作亂仲會陸續有來，佢哋喺區議會內嘅「配合」，就係一方面方便暴徒「做嘢」，一方面阻撓警方執法。講真啊，如果呢班人真係咁在意成本問題，大家應該諗下，之前有區議會仲話要用百萬公帑買防毒豬嘴（暴徒慣用裝備），點解又唔見佢哋出句聲？話呢班人心中冇「鬼」，你又信唔信？！囍雨就話，佢哋為咗撐暴，冇乜做唔出，市民嘅人身安全，當然被拋諸腦後！

原圖：文匯報

請Follow我們的YouTube頻道：

https://bit.ly/2kgU8qg

https://www.speakout.hk/app