黑暴運動持續大半年，令香港陷入前所未有嘅困境。警隊「一哥」鄧炳強日前接受媒體專訪，直言任何人犯法，無論佢哋背景係點，幾咁有權有勢，犯法就要拉；提及年輕被捕者時，鄧炳強坦言佢哋某程度上都係受害人，感慨青年被人煽惑，走上前線而斷送大好前程，警方定必揪出煽動暴力嘅幕後黑手，矢言「天網恢恢疏而不漏，違法就預咗要拉你」。囍雨就覺得，要解決黑暴肆虐嘅問題，只拘捕「前線」年輕人係唔夠，社會各界人士必須同警方合作，將幕後黑手揪出嚟、繩之以法，咁先可以有效遏止黑暴！

有人不違法 卻不停煽動人

鄧炳強指出，社會上有啲人為咗利益或者各種原因，不停煽動其他人犯法，尤其係年輕人，話爭取啲嘢係啱㗎，用暴力無問題，但呢啲人佢哋自己又唔會犯法，唔會出嚟，坐擁政治紅利，市民要清楚知道唔應該被人煽動違法。鄧炳強一番苦口婆心嘅說話，講出咗一個重點，就係有人知道違法有後果，但又想繼續抗爭，於是就利用種種謬論，煽動青年違法，然後坐收漁人之利。

對於鄧炳強喺專訪講嘅嘢，囍雨覺得有兩點非常值得注意，第一就係年輕人錯信謊言而走上違法抗爭之路，佢哋最可能面對嘅後果，就係煽動佢哋嘅人「安然無恙」，但呢班年輕人就要用上一生付出代價，就算警方對呢啲年輕人予以同情，呢啲年輕人都好難避免法律責任，結果就係做咗政客、黑手嘅「政治爛頭卒」，被犧牲咗依然覺得「有價值」。

另一個問題，就係警方單單去執法、拘捕前線年輕人，並唔係咩治本嘅方法，要徹底解決黑暴問題，就應該從根本出發，將煽動黑暴嘅黑手揪出嚟繩之以法，咁先至可以遏止到黑暴繼續破壞香港；仲有幾個月就係立法會選舉，黑手、政客一定會利用一切機會煽動年輕人繼續抗爭，喺呢個情況下，到底社會、警方可以做啲咩呢？如果有法律處理煽動他人抗爭、犯法嘅人，警方就有需要放膽執法！

教師、家長要向青年人解釋

就如「一哥」鄧炳強所講，家長、教師以至校長，都應該向年輕人解釋，所有訴求都必須以合法手法去爭取，任何形式嘅暴力都應該予以譴責；囍雨認為，單靠警方執法，就算揪出幕手黑手都好，做法都未夠主動，要防止年輕人以身試法，年輕人嘅身邊人、家人同朋友，都應該擔當起勸導者嘅角色，喺各層面勸喻年輕人唔好以身試法，以免抱憾終生。

原圖：新華社

請Follow我們的YouTube頻道：

https://bit.ly/2kgU8qg

https://www.speakout.hk/app