中西區區議會主席、民主黨成員鄭麗琼因為涉嫌喺網上面分享警察被「起底」資料被捕，本來一單非常簡單、罪嫌相當明顯嘅案件，就俾盲反派形容為警方「公報私仇、打壓異己」；其實，鄭麗琼涉嫌違法被捕，同佢喺區議員針對警方係兩回事，盲反派刻意製造出所謂「鄭麗琼監察警方不遺餘力，警方拘捕佢係公報私仇」嘅「因果關係」，一嚟侮辱市民智慧，二嚟根本係為鄭麗琼嘅不當行為轉移視線。
 
監察警方與涉違法被捕 是兩回事
 
根據《生果報》嘅報道，由於「鄭麗琼就任區會主席後監察警方不遺餘力，除以『PK鄧』稱呼警務處長鄧炳強，更把拒絕出示委任證的警員驅逐離場，民主派怒轟警方公報私仇，引用『生銹』殖民地惡法打壓異己」，就咁睇呢段報道，大家有咩感覺？覺得鄭麗琼被捕係因為被打壓，而唔係因為佢涉嫌違法？唔好玩啦！
 
今次案件嘅重點，根本唔係鄭麗琼點樣喺區議會「針對」警方，而佢到底有無涉嫌違法！囍雨舉個簡單例子，如果議員A批評警察，而議員A又有參與黑暴「打砸搶燒」而被捕，大家可唔可以話議員A係因為批評警察而唔係因為涉嫌「打砸搶燒」被捕？答案當然係唔可以，因為不論係議員A或者鄭麗琼，真正令佢哋被捕嘅原因只有一個，就係佢哋涉嫌違法！
 
盲反派以至《生果報》涉嫌製造出鄭麗琼被「打壓」、「濫捕」嘅故事，根本就係混淆視聽、轉移視線；如果盲派真係以事論事，點解唔講下鄭麗琼嘅行為有冇可能違法，例如涉嫌藐視法庭或者侵犯私隱呢？事到如今，要知道誰是誰非好簡單，只要警方繼續查落去，有足夠證據就將鄭麗琼送到法庭審訊，到時就會知道鄭麗琼有冇犯法，盲反派依家咁多「口水」，除咗營造出鄭麗琼被打壓嘅「感覺」，根本就唔係理性討論件事，更唔係尊重法治嘅表現。
 
「舊例」一樣成功告入戴耀廷等人
 
盲反派仲有一個爭論點，就係話鄭麗琼因為一條港英殖民時代嘅法例被捕，可能有違人權；就算真係告鄭麗琼《刑事罪行條例》中有關「煽動謠言」嘅罪行，控罪經唔經得起法律考驗，應該等法庭去做裁決，而唔係盲反派用政治觀感去決定，如果大家對違法佔領案件仲有印象，都會記得戴耀廷等人被告「煽惑他人犯公眾妨擾罪」等，果時班盲反派話條法律古舊、不適用，結果法庭咪一樣判戴耀廷等人有罪！法例存在得耐，根本就唔等於法例「失效」！
 
有朋友問囍雨，盲反派成日話俾人「以言入罪」，到底係咪「真有其事」？講真，誹謗等罪行，一樣係「以言入罪」，盲反派成日講到有言論自由好似「大晒」咁，其實只係佢哋轉移視線嘅技巧，如果市民選擇相信佢哋，咁就真係法治淪亡喇。
原圖：RTHK
請Follow我們的YouTube頻道：https://bit.ly/2kgU8qg 
下載我們的手機應用程式，收看第一手精彩內容：https://www.speakout.hk/app