今年九月就係立法會換屆選舉，呢排大家聽到最多關於立法會選舉嘅新聞，就係盲反派矢志要喺立法會選舉取得過半議席；日前，公民黨一班立法會議員見記者，稱如果佢哋能夠奪得過半議席，屆時會用盡方法逼使政府回應佢哋嘅所謂「五大訴求」，仲講到明包括否決每一個法案、每一個財政撥款。咁搞法，即係話如果俾佢哋贏到過半數嘅議席，就會嚟一次「終極攬炒」香港？睇嚟喺一班唔駛憂柴憂米嘅盲反派議員心目中，政府停擺、經濟衰退、市民生計等，佢哋真係唔關心喎！
癱瘓政府 = 癱瘓社會
公民黨講如果政府唔「處理」五大訴求佢哋會喺立法會否決所有嘢，可能大家未必知道當中嘅嚴重性，囍雨話俾大家聽，倘若俾佢哋攞到過半數35個議席，佢哋到時可以否決政府所有財政撥款（包括《財政預算案》），即係話政府會無錢用，醫院、診所可能要停擺，亦再無錢買醫療物資，到時香港會點？除咗醫療方面無錢用，大家仲要諗下，社福開支等等一律受到影響，老人家連生果金都無得攞！再推展落去，就係政府服務、執法單位都停擺，到時就真係會出現「無警時分」。
有人認為，呢場可能出現嘅浩劫，猶如一場核子戰爭，到時香港經濟將會受到第三波衝擊，失業率亦會大幅攀升，甚至去到20％以上；囍雨就認為，當政府停擺、所有公共服務受影響，社會經濟亦會隨之受波及，盲反派想取得立法會控制權，唔係要監察政府，而係要整死政府、扼殺香港先真！
喺呢度，囍雨必須要指出一點，就係公民黨好，其他盲反派政客也好，佢哋所謂嘅「五大訴求」，根本唔合理嘅！例如當中要求政府唔好檢控啲喺黑暴當中被捕嘅人士，同埋要特赦佢哋明顯就係有違法治精神；盲反派想取得立法會控制權，繼而脅逼政府去答應有違法治精神嘅訴求，會唔會太過分呢？
明目張膽地奪權
其實由舊年區議會選舉開始，盲反派一直煽動抗爭、黑暴運動，就係為咗議席，為咗奪權，大家亦要清楚，立法會選舉唔係盲反派嘅「終極目標」，由立法會選舉到特首選委選舉再到特首選舉，佢哋都會一路煽動仇恨，實現佢哋嘅最終奪權大計；佢哋能唔能夠奪權雖然仲未知，但佢哋搞黑暴搞咗大半年，將香港搞到「半生不死」就係鐵一般事實，市民、選民係咪仲要相信佢哋？支持佢哋？
原圖：RTHK
請Follow我們的YouTube頻道：
下載我們的手機應用程式，收看第一手精彩內容：
評論