盲反派喺立法會「拉布」嘅情況越嚟越嚴重，日前22名盲反派立法會議員仲聯署要求暫停同疫情無關嘅會議，否則會全力阻礙會議進行，說話講就講得好聽，但實際上咪又係為「拉布」搵藉口！今日立法會召開特別會議，審議政府約2158億港元的臨時撥款決議案，撥款內包括咗政府部門運作開支、防疫等各種項目，但盲反派就「出爾反爾」，表明支持立法會議員朱凱廸的中止待續議案，繼續諗住拖得就拖，險「拖死」臨時撥款，幸好撥款議案排除萬難，最終都獲得通過。廣男擔心，雖然今次議案順利過關，但係工務小組委員會、財委會同內務委員會嘅拉布一樣嚴重，情況絕對不容樂觀。
立法會各委員會拉布情況嚴峻
其實立法會工務小組委員會今朝都有召開會議，一開會盲反派就質疑，點解疫情之下仲要開會？其實原因好簡單，委員會受之前盲反派拉布影響，議程「大塞車」，有好多同民生有關嘅工程項目急需審批，當中包括港鐵沙中線追加撥款、發展區工程撥款、多個土木工程項目嘅研究撥款等，而且會議前仲有唔少盲反派表明要反對上述項目，恐怕想順利通過全部項目都幾難；另外，財委會同內務委員會嘅情況一樣膠著，大量議案積壓未能審議，當中內委會由去年十月中新會期開始後，到依家就連主席都仲未選到，運作完全停頓，真係相當誇張。
「拉布」隨時影響防疫、基層市民生計
其實盲反派到底知唔知道，喺立法會「拉布」後果有幾嚴重？單以臨時撥款嚟講，好在喺盲反派「拉布」之下，好彩都可以通過到，但如果議案受拖延或「拉死」，政府隨時停擺，換言之，醫療、社福開支，甚至連綜援「出糧」都會受到牽連，盲反派口講要抗疫，但係就繼續拉布，唔理醫護人員有無糧出，防疫工作會唔會受到影響？財經事務及庫務局局長劉怡翔今日就批評，如果撥款受阻，分分鐘連政府購買嘅防疫裝備都可能冇錢找數，而且大家唔好忘記，仲有一班依靠社會保障生活的老人和基層呢？如果福利金派發受阻，佢哋隨時開飯都成問題，盲反派想政府停擺，就不惜要市民一同「攬炒」？盲反派如果想表達不滿，就應該速戰速決速審議，用投票表決展示個人意願，而唔係用旁門左道嘅方法不斷拖延！
廣男想講，盲反派重點根本唔係關心疫情，推前返小小睇，之前盲反派已經對各種撥款、工程項目多多意見，就連臨時撥款都要將警方開支部分「獨立審議」，就連同警方有關嘅工程項目都要抽起，最終目的都係想阻警方得到撥款，係咪想警方資源唔夠，變相幫黑暴「助攻」？但係為咗反對警察而脅逼政府停擺，呢種行為根本就是用政治綁架民生，受害嘅正正就係全港市民！廣男想講，嚟緊九月又到立法會選舉，九月之後、未來四年，大家係咪仲想見到呢班政客繼續拉布、拖死香港？真係要認真諗清楚！
原圖：RTHK
請Follow我們的YouTube頻道：
下載我們的手機應用程式，收看第一手精彩內容：
評論