早喺去年11月底，有唔少分析已經指出，一個又一個打住反政府旗號嘅政客成為區議員，區議會以至社區，必然會俾佢哋搞到亂立立；果然不出所料，今屆區議會會期開始咗唔夠三個月，各區區議會已經亂象頻生，有區議會甚至想討論區內嘅「政制」同「入境」事務。近期，由深水埗區議員李文浩開始，仲牽起咗一股唔服務政見不同市民嘅歪風，歪風甚至蔓延到離島，連離島區議員王進洋都模仿。廣男實在忍唔住要問一句，今日呢個盲反派議員話唔服務某啲居民，聽日第二個盲反派議員又話唔服務其他人，咁落去盲反派議員係咪可以支公帑但自己「鍾意做乜就做乜」先？
盲反派議員的「風土病」
廣男必須要指出，一開始有盲反派議員拒絕服務政見唔同嘅居民，大家可以話係個別事件，但係當李文浩、劉家衡之後又出現王進洋，王進洋甚至再講明「如果該市民反映區內物價問題等涉及公眾利益事宜，佢會受理；但要求協助申請公屋等，就唔受理」，好明顯盲反派議員「揀」服務對象、拒絕服務部分居民已經係事實，但身為區議員，佢哋拒絕履行職責（服務區內所有居民），根本就係失職，應該要追究！
前刑事檢控專員江樂士早前接受訪問，表示如果區議員拒絕向大批選民提供援助，令佢自己偏離區議員職責，可視為嚴重嘅失當行為；對於李文浩、劉家衡以至王進洋，佢哋到底有冇犯下公職人員行為失當罪？喺區議會指引下，佢哋又有冇違反任何工作指引？廣男覺得政府民政部門要跟進呢幾個「瀆職」議員之外，執法部門亦要睇下呢啲議員，到底有冇犯法？
齊齊測試「瀆職」議員
既然呢幾位議員咁高調拒絕服務部分市民，廣男有個建議，大家如果係深水埗、東涌居民，不妨去佢哋幾位區議員嘅辦事處，問下佢哋係咪唔服務大家；如果係嘅話，廣男相信已經證明到佢哋「蓄意」作出失當行為，可以舉報佢哋。有朋友問廣男，人稱「快必」嘅人民力量成員譚得志之前派防疫物資俾街坊時，逼街坊先要政治表態才可獲得口罩，可唔可以「追究」埋「快必」，廣男覺得真係有啲唔好意思，因為「快必」並唔係立法會議員，亦唔係區議員，唔夠能夠以「公職人員」罪名舉報佢呢，但大家可以譴責佢，對佢「借防疫搞政治」嘅手法表示不滿。
原圖：王進洋社交網站、區議會網頁
請Follow我們的YouTube頻道：
下載我們的手機應用程式，收看第一手精彩內容：
評論