囍雨日前睇到一則新聞，相當憂心。事緣有跡象顯示，「國際特赦組織」（Amnesty International）企圖透過與香港一間國際學校合辦課外活動，達至「引導學生成為爭取人權分子(human rights activist)」嘅目的。雖然校董會方面表示絕對唔會認同任何恐怖主義及「港獨」組織，相關課外活動亦都因為疫情之下學校停課而取消，但囍雨喺度諗，事件係咪敲響政治組織滲透香港校園嘅警鐘呢？政治組織、境外勢力、國際學校…，呢啲曾經只係出現喺電影甚至笑片入面嘅橋段，依家就似乎出現喺現實生活，之不過，令人一啲都笑唔出！
講到「國際特赦組織」（下簡稱「組織」），相信大家唔會陌生；如果上網search下啲相關資料，大家就會更加明白囍雨嘅擔憂。對於呢嘅所謂「非政府組織」，囍雨覺得佢基本上更加似一個反政府組織。翻查公開報道，舊年香港暴亂期間，組織就不斷以發表所謂報告等多種形式指摘、抹黑警方「毒打」、「酷刑」，但就對暴徒暴力視而不見。之前一位印度學者就曾經公開斥責國際特赦組織以非政府組織之名，「為西方利益服務及輸出西方意識形態，在人權問題上採取雙重標準」。台灣學者張亞中亦都分析過，呢個組織經常煽動製造內亂，喺世界各地扶植親西方政權……
重重疑問要追查！
所以當囍雨睇到「國際特赦組織」竟然要同香港嘅國際學校「搞活動」時，第一反應就係四個字：小心警惕！尤其想引導學生成為「human rights activist」，究竟咩意思？呢個究竟係咩課外活動？更加重要嘅問題係，幕後有啲咩人牽線？有冇老師涉嫌專業失德？今次雖然因為疫情之下學校停課而取消「活動」，但大家又要諗，咁如果冇疫情呢？難怪有家長擔心會唔會又有一批學生變得激進化？
不能掉以輕心
囍雨認為，對於今次事件，大家絕對唔可以因為活動取消咗就當冇咗件事，更加唔可以掉以輕心！正確嘅做法，應該係嚴肅追查落去，如果發現有老師涉嫌違規、失德、甚至違法，就要依法嚴厲處理；如果仲發現其他學校有類似「港獨」甚至激進活動，咁就更加需要警應對、盡快處理！囍雨想講，街頭黑暴、掟汽油彈呢啲「明刀明槍」，尚且仲有得靠警察對付，但潛移默化洗腦、播種仇恨種子，危害就更深更遠！
圖片來源：網上圖片
請Follow我們的YouTube頻道：
下載我們的手機應用程式，收看第一手精彩內容：
評論