如果一個機構出現個別事件例如有不當行為，大家可能會認為只係呢個機構入面嘅「個別人士」有問題；但如果一個機構「接二連三」出現問題呢？咁就可能反映成個機構都有問題。講緊邊個機構？梗係近期因為不實指控警察又唔肯道歉嘅香港電台啦！最新消息，佢哋因為之前有主持人喺節目度「兩度爆粗」，令通訊事務管理局向佢哋發出強烈勸喻，並敦促佢哋嚴格遵守有關守則。咁強烈勸喻之外，通訊事務管理局有冇俾咩實質懲罰港台？囍雨就睇唔到喇，成日「出錯」、「出事」都「無後果」，港台高層、員工以至工會咁氣焰囂張，真係唔係無原因嘅！
港台係「粗口」電台？
除咗今次有深宵節目嘅主持「爆粗」被勸喻外，有朋友溫馨提示囍雨，港台主持講粗口，並唔係第一次，之前人稱「小豪子」嘅曾志豪，亦試過做節目時候「按錯咪掣，不慎令四字粗口直播出街」，最後港台點罰佢、有冇炒佢？據報只係罰佢停咗11日咪，直到依家，曾志豪仲係《頭條新聞》主持，而且好「過癮」咁喺節目度「反政府」。講粗口只係停下咪，之後又繼續主持節目，囍雨真係睇唔到港台主持違規，要付上咩代價囉。
其實無論係「粗口事件」抑或《頭條新聞》對警方作出不實指控，兩者都有一個共通點，就係港台無論點「做錯」，永遠都好似無後果咁！以《頭條新聞》為例，明明係基於無事實根據嘅嘢「屈」完警方一輪，港台或者港台工會仲可以叫人唔好干預佢哋「編輯自主」，甚至連港台顧問委員會都要俾佢哋攻訐埋。呢個係咩問題？係制度、組織問題，一日唔解決呢啲根本問題，通訊局點「勸喻」，顧委會比咩意見港台都無用！
反政府橋頭堡 從不鬧盲反派
香港電台雖然係用緊公帑嘅公營廣播機構，但佢嘅運作，就好似係一個政府轄下嘅「反政府組織」咁，大家幾時有見過佢批評、戲謔盲反派？好難囉！對於唔少意見話要整頓港台，囍雨覺得都係有啲道理，唔係話要港台變成「幫政府」嘅廣播機構，但起碼都唔好咁偏頗，然後仲要話自己「持平、準確」啦！最後一點，就係《頭條新聞》不實指控警方一事，囍雨要提提大家，港台至今依然半句道歉都無，大家一定要繼續跟進。
原圖：大公報
請Follow我們的YouTube頻道：
下載我們的手機應用程式，收看第一手精彩內容：
評論