繼深水埗區議員李文浩、劉家衡侮辱、拒絕服務「政見不同」居民後，盲反派又出現拒絕服務「部分」居民的區議員！離島區議員王進洋日前喺社交平台發表「聲明」，表明拒絕接受任何支持《基本法》23條立法的市民求助，之後元朗區議員林進亦跟隨王進洋作出相同「聲明」。囍雨就認為，當出現第一個、第二個議員表明拒絕服務「部分」居民而「無後果」，其他盲反派議員「真心」好，為做政治騷都好，都會陸續仿效呢啲議員，好似潘朵拉盒子被打開一樣；其實，作為區議員但又拒絕服務「政見唔同」嘅居民，不如直接辭職做「街頭鬥士」啦！
李文浩、劉家衡帶頭「瀆職」
自從李文浩、劉家衡喺議員辦事處外貼出「藍絲與狗，不得內進」告示後，做法震驚全港，原來作為區議員，可以咁樣侮辱「政見唔同」嘅居民，仲可以擺明車馬唔服務「藍絲」（支持政府、建制人士）；咁王進洋、林進仿效李文浩同劉家衡，其實只係「跟隨」潮流，但囍雨要問一句，依家有區議員拒絕履行職責，點解好似無後果咁嘅？
據傳媒報道，民政事務總署有強烈勸籲李、劉盡快移除告示，仲「提醒」佢哋有關行為涉嫌違反《區議員及區議會轄下委員會成員操守指引》；講真，叫李、劉移除告示當然有必要，但囍雨認為無論係李文浩、劉家衡、王進洋以至林進，佢哋嘅問題，仲包括故意忽略或不履行職責，政府、執法部門應該要循住《公職人員行為失當罪》嘅方向調查甚至追究佢哋，單純留喺勸籲層面，呢班反對、抹黑開政府嘅議員，一定當「耳邊風」！
公職人員不可以「選擇」服務對象
如果係普通市民，佢哋可以選擇幫邊啲人、唔幫邊啲人，但作為議員及公職人員，佢哋嘅職責就係服務市民，履行職責時根本唔應該分「顏色」、政見！今日李文浩、劉家衡、王進洋同林進，表明拒絕服務「政見唔同」嘅居民，既無視職責，亦欠缺議員應有嘅道德，市民一定要認清呢啲政客嘅真面目。再者，今日佢哋可以唔服務「藍絲」、支持23條立法嘅人，他日一樣可以唔服務其他人！如果呢個世界真係有咁多「選擇」，囍雨交稅嘅時候，可唔可以選擇所繳納嘅稅款，唔可以用嚟出糧俾呢啲盲反派甚至縱暴派議員呢？
原圖：王進洋Facebook、文匯報
請Follow我們的YouTube頻道：
下載我們的手機應用程式，收看第一手精彩內容：
評論