今日，廣男收到一張聲稱係外國留學生搭飛機返香港嘅相片，相入面嘅年輕人一身防護裝備，有人笑言佢哋好似面對緊生化危機咁。點解突然間咁多留學生返香港，「走得咁急」仲要全身裝備呢？因為新冠肺炎喺歐美爆發得好犀利，而歐美唔少國家都玩「佛系抗疫」，喺外地嘅香港人怕留喺外國會被感染，所以唔少都急急腳返香港。但廣男又覺得奇怪喇，當中好多人之前唔係仲鬧緊香港政府唔掂、抗疫工作做得差咩？點解唔留喺「先進、文明」嘅外國，要返嚟「樣樣都唔掂」嘅香港呢？
香港政府無能？
好多嘢，有時真係要有比較先知邊個好。年初新冠肺炎開始爆發時，香港政府就被唔少人尤其係盲反派政客鬧到「狗血淋頭」，一時話政府唔封關，一時又話香港政府應變慢，總知彈到香港政府「一文不值」；好喇，當新冠肺炎喺歐美等國家爆發時，呢幾日大家都見到好多人一窩蜂由外國返香港。就算係一直反對政府嘅教育界立法會議員葉建源，都叫香港學生考慮盡快返香港，仲叫特區政府透過外地中國領事館為在外國嘅港人「提供協助」；依家先知國家、香港好，黑暴運動果時又唔見啲政客咁講？
其實，啲人包括盲反派政客喺呢個時候「知香港好」，係因為香港防疫工作的確做得到位。如果大家有留意全球各地嘅新冠肺炎確診數字，會發現香港嘅防疫工作做得相當之唔錯，至今百幾宗個案，數字可能比一啲地方例如南韓一日嘅確診數字仲要少！當中原因，既包括政府嘅隔離、檢疫等措施見效，亦因為香港人自律，懂得提高防疫措施。否則，就唔會咁多喺外國嘅人不斷返香港，盲反派政客同某啲香港人一樣，口裡說不，但身體好誠實嘅。
不見政客叫全面封關
當初內地爆發新冠炎，香港好多盲反派政客以至醫護都不斷高呼要對內地「全面封關」，依家外國嘅肺炎個案急升，點解廣男好似唔見有盲反派政客出嚟呼籲要對歐美等國「全面封關」？又唔見醫護罷工？如果只係針對內地，而唔叫政府封歐美「關」，呢啲係咪雙重標準？定係好似某啲評論所言，英美係本港盲反派政客嘅「主子」，所以佢哋唔敢出聲？其實內地以至香港嘅防疫工作做成點，大家心中有數，如果啲人尤其係盲反派政客講到外國咁好，大家應該快啲請佢哋去「馳援英國」、「馳援美國」，唔好留喺咁唔掂嘅香港喇！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論