世界之大，無奇不有！曾幾何時，只要有人歧視其他人，內地人好，外國人也好，外界都會對呢啲戴住「有色眼鏡」嘅人「口誅筆伐」；但世界變咗，香港變得更「厲害」，原本身兼民主黨中央委員嘅社區組織協會幹事蔡耀昌，就因為代表社協同平機會主席朱敏健見面，促請平機會調查有食肆不招待內地人，就俾民主黨嘅黨員「逼宮」，最後被逼辭去民主黨中委等職務。成件事好簡單，蔡耀昌只係反對歧視內地人，但民主黨一大班政客就「歧視」蔡耀昌反對歧視，所謂民主第一大黨，原來只係一個政治掛帥、容許批鬥、帶頭歧視嘅「政棍政團」！
蔡耀昌不敵「政治歧視」
對於民主黨內部「圍威喂」，直接或間接逼蔡耀昌辭去黨內職務，囍雨覺得件事係100%政治炒作，黨內有人不滿蔡耀昌做法，大可以攤出嚟講，但聯署要佢辭去黨內中委一職，用意唔單止係不滿蔡耀昌，而係要話俾「全世界」聽，民主黨係排斥內地人（至少疫情期間係），係民粹當道嘅情況下，民主黨犧牲咗一個老臣子，但就可以保住自己「反政府、反中央」嘅招牌，甚至保住部分選票；喺民主黨以至《生果報》等內外夾擊下，蔡耀昌被黨內「反中勢力」攞嚟「祭旗」，喺一夜之間成為「千古罪人」，可憐嘅係佢喺盲反派立足咁耐，甚至喺支聯會都相當有分量，都無可避免地「陣亡」。
民主黨重申「民主黨支持商戶採取合理防疫措施，拒絕高風險人士光顧，絕不涉及任何歧視行為，會尊重和支持防疫」，囍雨真心想問下民主黨，喺佢哋呢個「前提」底下，會唔會呼籲啲商戶拒絕歐洲人光顧，包括意大利人、西班牙人以至法國人？又會唔會呼籲啲商戶拒絕伊朗、伊拉克等國家嘅人光顧？如果剩係支持啲商戶拒絕內地人，但又唔表態叫人拒絕埋歐洲甚至美國人，咁唔係歧視咩？
平機會要查埋民主黨？
囍雨真心唔知道，歧視內地人構成歧視，如果有政黨「逼走」反對歧視嘅成員，又算唔算係歧視？民主黨依家正正就係歧視緊反對歧視嘅成員，甚有助長歧視嘅感覺，平機會會唔會查下民主黨咁做有冇問題？又或者，就算唔查民主黨，平機會代表係咪要評論下政黨咁做有冇問題？曾幾何時，被稱為「大中華友」嘅民主黨，唔單止唔會歧視內地人，甚至會視內地人為一家人；時移勢易，民主黨已經成為助長歧視甚至有份歧視內地嘅政團。見到蔡耀昌嘅「下場」，就令囍雨諗起之前馮煒光因為應徵職位加入政府而被「批鬥」最後退黨以及黃成智因為支持「袋住先」被革除黨籍嘅「民主黨黨史」，原來「民主」底下，根本就「無民主」！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論