自從港台《頭條新聞》不實地「諷刺」警隊「裝備多、唔駛點做」之後，港台內裡唔同層面嘅人都出嚟「狡辯」一番，直至噚日，廣播處長梁家榮都「出手」喇，佢向港台員工發信，重點大概包括《頭條新聞》收到三萬多宗讚賞、「獲得市民認同」，同埋稱《頭條新聞》絕非新聞報道節目、其內容特色為「借諷刺針砭時弊」；簡單嚟講，就係《頭條新聞》「無問題」，仲有好多人讚賞！其實講咁耐，大家都係講緊港台節目作出評論無基於事實，抹黑咗警方，點解港台上上下下都覺得「無問題」，以為一兩句「借諷刺針砭時弊」、「嬉笑怒罵」就可以過關呢？
與梁家榮商榷事實問題
對於貴為廣播處長嘅梁家榮出手為港台「辯護」，囍雨覺得有啲道理真係要講清楚，梁家榮稱《頭條新聞》好多人讚賞，咁係咪好多人讚賞，就講乜、做乜都得先？好多人讚賞，就可以作出不實評論？又或者係咪好多人讚賞，直頭抺黑誹謗警察「殺人放火」都得？囍雨要指出，《頭條新聞》嘅問題，係一個是非問題，唔係一個幾多人「讚賞」嘅問題；作為廣播處長，囍雨覺得梁家榮得分辨清楚。
至於稱《頭條新聞》絕非新聞報道節目，內容特色為「借諷刺針砭時弊」，囍雨又唔明，叫做《頭條新聞》，但又同新聞無關？都算喇！咁如果唔係新聞節目，點解港台工會為《頭條新聞》辯駁嘅時候會用「編輯自主」做擋箭牌？即係戲劇節目唔係用「創作自由」去形容，而用上新聞節目嘅字眼例如「編輯自主」？
其實《頭條新聞》嘅問題，坊間可能已經講過一千次，節目嘅問題癥結、被人批評嘅地方由頭到尾都係話佢作出評論但無基於事實，令人誤以為警方好多「防疫裝備」等等，港台工會唔正面回應事件，港台發言人又唔正面回應，依家連廣播處長都玩呢招？囍雨覺得，港台上上下下嘅人員，其實都係喺度迴避緊問題，「顧左右而言他」！
違反《港台約章》
誠如港台顧問委員會主席陳建強所言，港台係有《香港電台約章》需要遵守，包括要「提供準確持平的新聞報道、資訊觀點和分析」；囍雨就喺度諗，港台作為用緊公帑嘅公營廣播機構，但就好似完全不受規管咁，其實社會係咪要諗下，應該如何規範、監管好我哋嘅「公營廣播機構」呢？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論