盲反派區議員李文浩、劉家衡以「狗」侮辱市民，引發公憤。廣男最睇唔過眼嘅地方，係佢哋明明做錯，仲要百般狡辯，一時死撐「藍絲」唔係指人，而係物品；一時又賴「對號入座冇人控制唔到」。呢啲黑心政棍，做得出又唔敢認，又要威又要戴頭盔，一句講晒，就係死唔認錯、死不悔改。所以廣男呼籲大家一定要不斷發聲，嚴厲追究到底。大家諗下，如果今次佢哋咁過分都可以「過到骨」，咪即係等於變相鼓勵其他黃絲政客有樣學樣？！
廣男今日睇新聞，原來已經有好多區內市民寫咗信去投訴李、劉二人，投訴內容幾乎全部涉及遭受侮辱、有區議員唔願意提供服務等；另外，由民建聯立法會議員鄭泳舜及深水埗團隊發起嘅簽名行動（追究李文浩同劉家衡責任），據聞一日之內已經有萬計嘅市民聯署。廣男認為，呢啲都反映其實依家已經群情洶湧，要求李、劉必須為自己言行負責嘅市民越來越多。
研究法律途徑追究
有政界人士就分析，李文浩同劉家衡嘅問題絕對「唔簡單」。兩人各自公開張貼嘅告示，除咗極度侮辱、歧視，擺明仲有「唔服務某類居民」嘅用意，作為收取公帑嘅公職人員，佢哋咁做，已經涉嫌干犯「公職人員行為失當」罪當中，「故意忽略或不履行職責」嘅部分；佢哋又有冇違反當日參選時簽署嘅承諾書？係咪發表失實聲明？唔單止咁，身為區議員，佢哋仲多次係網上散播侮辱、挑釁及仇警言論，當有市民去到其議員辦事處抗議、投訴，佢哋嘅「工作人員」仲謾罵市民甚至向市民潑漂白水。廣男想講，單係呢「三宗罪」，佢哋固然必須公開道歉、受到譴責，但絕對唔可以就咁「了事」，而係有必要循法律途徑嚴肅追究，包括DQ佢哋，否則根本起唔到警示、阻嚇作用。
講真，社會因為政治事件出現立場分歧，一啲都唔出奇，但因為政治立場唔同，公職人員就歧視市民、用「狗」嚟侮辱市民，呢啲事情發生喺今時香港，廣男就點都接受唔到！調番轉頭講，作為納稅人，可唔可以話自己嘅血汗錢唔準用嚟養呢班黑心政棍？建制派議員又可唔可以「有選擇性地服務」？如果呢啲問題都唔成立嘅話，咁又有乜理由唔去嚴肅追究李文浩、劉家衡咁失德嘅議員？廣男希望大家明白，如果「放生」佢哋，絕對唔係顯示香港有幾包容、自由，而係法治、文明嘅大倒退。
原圖：文匯報
請Follow我們的YouTube頻道：
下載我們的手機應用程式，收看第一手精彩內容：
評論