喺香港同外國，唔同人睇黑暴運動可以話係兩個世界，香港人大部分都睇到黑暴運動嘅禍害，甚至成為被「攬炒」嘅對象；但喺外國呢，由於本港盲反派政客不斷向外抹黑港府、警方，所以唔少外國政要、政客都以為「警方好暴力」。美國國務院發表2019年人權報告，指本港有重大「人權」問題，包括警方「粗暴對待」示威者、任意拘捕同干預和平集會自由等等。囍雨又係果句，外國包括美國官員，到底有冇睇清楚香港發生咩事呢？
應看清楚黑暴運動
對於美國國務院嘅人權報告，囍雨可以用三個字去回應，就係「唔同意！」，例如入面提到嘅8.31事件，警方執法係因為附近一帶有人非法集結、堵路甚至破壞，而唔係警方「無故」地嚴厲執法；至於新屋嶺事件包括「拘留人士受虐待同性侵犯」，呢個係好嚴重嘅指控，美國係「引述示威者和其他人的指控」？係咪講緊俾人踢爆咗根本無去過新屋嶺果個中大女學生？如果係，咁等同基於「假消息」作出不實指控！
老實講，如果係和平集會，囍雨當然會認為唔應該干預，但美國有關人士可能唔知道（或者俾盲反派誤導），由去年6月至今，盲反派好多所謂和平集會或遊行，最後都變成暴力衝擊、抗爭，就算係號稱「和理非」嘅民陣所搞嘅遊行，都可以喺遊行後「自動升級」變成打砸搶燒嘅暴動。明知有人以和平集會為藉口搞暴力抗爭，囍雨真係想知如果喺美國，係咪一樣「自由」到可以「不受干預」。其實，美國對港府、港警作出「指控」，但完全忽略咗港府、港警執法嘅「前傳」，完全漠視暴徒「打砸搶燒」嘅真相！
請看清黑暴真相
整個黑暴運動嘅運作非常簡單，就係暴徒「打砸搶燒」，然後諉過於執法嘅警方，之後就利用謊言、假消息去「炒熱」、抹黑警方，再煽動下一波暴動。美國作為超級大國，對於種種政治操作應該瞭如指掌，點解佢哋嘅人權報告，好似Copy and Paste（複製粘貼）番本港盲反派嘅言論咁嘅？係佢哋錯信咗香港嘅盲反派政客？定係佢哋根本就係「順水推舟」，有目的地抹黑香港甚至中國？其實反對暴力，應該係國際標準，當出名「強力執法」嘅美國竟然出手攻訐打擊罪案嘅港警，囍雨話當中「無古怪」，大家又信唔信呢？
請Follow我們的YouTube頻道：
下載我們的手機應用程式，收看第一手精彩內容：
評論