由盲反派把持嘅屯門區議會噚日開會通過一項動議，要求預留300萬公帑購買防疫品，其中100萬用嚟購買「豬嘴」面罩及濾罐。囍雨認為，區議會討論防疫，當然冇問題，亦唔反對用公帑為市民添置防疫物資，但「用100萬公帑購買豬嘴」，就係大問題！既然涉及公帑，囍雨首先諗到兩個問題：咁大筆納稅人嘅錢，係咪用得合理？豬嘴又係咪起到防疫作用？更何況對於「豬嘴」呢樣嘢，大家都會自然聯想到暴徒裝備，依家呢班「同路」政客打算用公帑大舉購買，究竟真係為防疫？定係為撐暴？係個大問號！
有違運用公帑原則的議案
其實對於囍雨提出嘅兩個問題，從噚日會上發言就基本上可以搵到答案。屯門區議會秘書劉振輝就提到，依家一個「豬嘴」嘅價錢大約300蚊，係普通外科口罩嘅60倍。照咁推算，100萬最多買到大約3300個，囍雨想講，呢個數字連友愛邨是但兩棟樓嘅居民都未必cover到，點樣「物有所值」、幫到更多市民呢？另外，民建聯嘅賴嘉汶亦都提出，原來連本身係醫生嘅立法會議員郭家麒都曾經表示，「豬嘴」其實起唔到防疫作用。即係話，使100萬只可以「幫到」少數人，仲未必防到病毒。囍雨就話，呢個議案似乎有啲搵政府、搵市民「笨」喎。
防疫物資會否變暴徒物資？
所以總括嚟睇，盲反派「百萬公帑買豬嘴」嘅所謂方案，絕對唔符合運用公帑原則，所以連當區民政專員都對撥款「有保留」；囍雨認為，如果班政客真係想幫市民，令筆錢「用得其所」嘅方法其實仲有好多，例如幫區內街坊訂購口罩，又或者好似工聯會議員陳有海所講，支持區議會秘書處購買防疫包，都肯定幫到更多人，而且效果更實際。換個角度講講，就算真係買咗批豬嘴返嚟，到時會點派發？派畀咩人？其實大家都真係唔知，尤其依家區議會係盲反派把持大局，囍雨喺度諗，最後會唔會好似有啲市民所擔憂咁，防疫物資「靜雞雞」變咗暴徒物資？大家都真係相當有懷疑喎！
囍雨擔憂嘅另一個問題，係呢班盲反派可能根本藉住手中有權、另有所圖。大家諗下，一個咁唔符合經濟原則、運用公帑原則、而且冇實際效用嘅議案，居然都可以喺區議會獲得通過，咁下次如果班盲反派又話為咗防疫，要用公帑買電油、買石油氣罐、玻璃樽之類嘅「暴動現場常見物資」，係咪都照樣會獲得通過呢？如果真係咁，有啲咩人會「得益」，囍雨唔知；但可以肯定嘅係，區內街坊必定苦足四年、香港必定亂足四年！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論