警方日前破獲一宗2,600公斤的炸藥案，阻止暴徒利用爆炸品在市區「殺警殺人」，但喺警方行動嘅同時，網上就流傳一個又一個「陰謀」，囍雨見到警方嘅拘捕行動，被抹黑為「大清算」，網上仲呼籲叫去過理工大學嘅「手足」立即「清屋」，有網民稱警方「又殺人」，甚至有盲反派區議員到警方執法現場「滋事」！其實，件事非常簡單，就係有人犯案，警方就要執法，當警方執法都要被抹黑，黑暴嘅謊言已經去到「無藥可救」嘅地步！
黑暴謊言 永無休止
黑暴運動持續半年多仍未止息，黑暴嘅謊言當然亦都係「從未停止過」。日前亦有人以悼念周梓樂為由集結，有聲音批評「既然話周梓樂嘅死與警方無關，咁市民悼念周梓樂又關警察咩事」，但事實係點呢？事實係警方當晚喺將軍澳截查可疑人士，結果檢獲汽油彈、玻璃樽以至磚頭。囍雨真係好奇，如果單純要悼念某人，點解會有汽油彈、玻璃樽？如果悼念變成「非法集結」，咁警方又點可以坐視不理？
警方拘捕疑犯被屈變成「殺人」？悼念周梓樂時某啲人會有「武器」？其實一切一切，都係黑暴用謊言繼續挑撥矛盾，煽動其他人去「違法達義」嘅藉口，同黑暴人士炒作「8.31太子站」、「陳彥霖離世」、「新屋嶺」等事件一樣，每一次都加劇市民同警方之間嘅矛盾，但每次事後都被揭發事件只係「黑暴謊言」！相信謊言，絕對唔係無傷大雅，因為謊言會加劇社會矛盾，令黑暴繼續滋長，暴徒繼續「打砸搶燒」，香港一直被「攬炒」！
應研究立法規管假新聞？
對於黑暴謊言或者假新聞，囍雨覺得以前社會氣氛無咁緊張，無不法之徒利用假新聞煽動犯罪，香港無必要處理假新聞問題；但今日香港，黑暴謊言、假新聞已經成為暴力「源頭」，社會係咪應該關注下點樣應對假新聞呢？政府係咪應該要立法？對媒體包括新媒體係咪要有所規管？當鄰近地方包括台灣、新加坡都有法例處理假新聞，而香港仲停留喺「紙媒」年代嘅思維，咁樣種種網絡謊言，肯定會繼續為香港種下禍根。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論