上星期囍雨寫過，深水埗區議員李文浩喺佢同另一區議員劉家衡嘅聯合辦事處門口，貼上「藍絲與狗不得內進」告示，大有侮辱政見不同市民、拒絕服務部分市民嘅「罪嫌」；話口未完，劉家衡又「聲援」李文浩，喺同一辦事處貼出「各位藍絲、狗要怪就怪（鄭）已完不爭氣，不能再為你服務，再見﹗」，擺明又係侮辱市民。囍雨上星期仲講緊李文浩應該要向公眾道歉，不過囍雨覺得呢番說話實在太溫和，無論係李文浩抑或劉家衡，呢種侮辱、「拒絕」服務部分市民嘅做法，如果經查證係違反「公職人員行為失當」罪當中「故意忽略或不履行職責」部分，咁執法部門、政府就要考慮檢控甚至DQ兩人。

擺明侮辱市民

劉家衡貼出嘅告示，可以話係同李文浩嘅辱人告示「一脈相承」，一樣係將「狗」同「藍絲」寫埋一齊，劉家衡仲好「自豪」地喺社交平台表示，「對號入座這回事，沒有人能夠控制；而使用擬人法比喻法，是向偉大的香港警察學習」；其實講咁多嘢，劉家衡係咪又想侮辱人，又唔敢認？即係又要貼出告示侮辱人，又要話人「對號入座」、自己只係用「擬人法比喻法」？囍雨只能夠講，劉家衡同李文浩一樣，都係「又要威，又要戴頭盔」嘅政棍！

另一個問題，就係劉家衡稱「各位藍絲、狗要怪就怪（鄭）已完不爭氣，不能再為你服務，再見﹗」，佢係想講其他人服務唔到「藍絲」，定係同李文浩一樣，都想話自己唔服務部分政見唔同嘅居民呢？如果講其他人唔係講自己，做咩要貼呢啲出嚟？如果係講自己，又係敢做唔講認？

DQ李文浩、劉家衡

其實除咗囍雨之外，有唔少人都提出相同觀點，就係李文浩、劉家衡貼出告示，告示確實有「唔服務某啲居民」嘅用意，咁樣可能違反咗「公職人員行為失當」罪當中有關公職人員濫用職權、故意忽略或不履行職責嘅部分。作為區議員、公職人員，明明領嘅薪酬津貼都係公帑，但就意指唔服務某啲居民，係咪故意忽略或唔履行職責？係咪應該有市民舉報佢哋？係咪要查、要告甚至要DQ佢哋？囍雨想喺度同李文浩同劉家衡講句，敢做敢認未算最衰，敢做唔敢認，仲衰！侮辱人又想卸膊，不如一開始就唔好做，免得俾人鬧又俾人「狙擊」啦！ 

原圖：FB截圖、港人講地

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app