盲反派政客成日俾人一種感覺，就係其他市民成日會覺得呢班人好似「惡晒」咁，明明集會、遊行未經批准，就話自己有權「乜乜乜」；明明係暴徒打砸搶燒，佢哋又可以掉返轉話執法嘅警方先係「錯」。最新亦都係最有趣嘅例子，就係「香港眾志」秘書長黃之鋒因為涉及喺去年8月「煽惑他人參與未經批准的集結」、「明知而參與未經批准的集結」及「組織未經批准的集結」而保釋緊，保釋條件包括有「不准離港」，但黃之鋒明知自己不可外遊，都仲同英國出版社簽約準備去演講，然後申請「保釋覆核」，俾法官批評就算被告違約都係佢「咎由自取」。其實，邊有被告明知自己「不可離港」，仲同外國出版社簽約答應去「演講」咁奇怪嘅呢？
黃之鋒以為自己「大晒」
成件事嘅問題，唔只在於黃之鋒有冇得「外遊」，而係黃之鋒其實清楚知道自己係不可離港，點解仲要同出版社簽約，諗住離港到英國出席新書發布會呢？佢覺得法庭要為佢「度身訂造」保釋條件？定係覺得全世界都要遷就佢，因為佢「國際政客」嘅身份「大晒」？
更加根本嘅問題，就係大家要記住，黃之鋒嘅身份，除咗係政客之外，佢依家係一宗甚至多宗刑事案件嘅疑犯、被告，法庭唔俾黃之鋒離港，係因為佢同其他刑事案疑犯或者被告都一樣，都有棄保潛逃嘅風險，法庭唔可以因為佢「有名氣」而貿然俾佢離開香港，呢個亦都係「法律面前，人人平等」嘅一種法治精神！
要避免被告潛逃
所以如果任何一個被告借住可以「外遊」而離港，法庭又俾佢更改保釋條件嘅話，就等同佢有機會「畏罪潛逃」；大家想像下，若然黃之鋒成功更改保釋條件後，原來唔係買機票去英國而係買機票去咗台灣，咁台灣同香港之間因為無長期司法互助或者移交逃犯嘅協議，黃之鋒咪又會成為一個「流亡台灣」嘅義士？所以法庭唔俾黃之鋒「飛」，絕對有道理！更何況，黃之鋒自稱打通「國際戰線」，有咩事喺外國，喺「國際戰線」上面，可能會有好多人支援佢，咁仲點可以俾佢「周圍飛」呀？
圖片來源：
請Follow我們的YouTube頻道：
下載我們的手機應用程式，收看第一手精彩內容：
評論