盲反派政客、媒體直到依家，都仲成日話「8.31太子站警察打死人」，過去半年，佢哋藉著呢個彌天大話，個個月搞「悼念」，煽動起一批批盲目信眾上街抗爭、甚至黑暴打砸搶燒（上星期旺角衝突亦都因此而起）。日前，盲反派西貢區議員動議，將兩個將軍澳休憩處以15歲少女陳彥霖及墮樓離世嘅科大生周梓樂命名（目前動議喺會議上已被腰斬），廣男睇到動議文件，發現一個相當有趣嘅地方，就係文件白紙黑字形容周梓樂「是首位於反修例警民衝突現場附近喪命的香港人」，問題嚟喇，咁「8.31」呢？照咁講，即係盲反派議員都間接承認，8.31太子站係冇死人喎！
對於呢段咁具真憑實據意義嘅文字，廣男喺度必須原文照錄畀大家一齊見證下：
周梓樂同學於2019年11月4日凌晨時份將軍澳警民衝突期間，從尚德邨停車場的三樓跌下二樓重傷，延至11月8日8時不治，是首位於反修例警民衝突現場附近喪命的香港人。
承認太子站冇人被打死
大家可以睇到，文中時間、人物、地點等資訊全部相當具體，廣男絕對有理由相信，呢班區議員為咗自己呢份動議得到認同，而且除咗動議人陸平才之外，仲有柯耀林、李嘉睿等七位議員和議。咁好啦，如果呢班議員依家話周梓樂係「首位死者」，而離世時間又係11月嘅話，咁係咪等於佢哋間接地承認咗，其實8.31喺太子站根本就冇人死、更加冇所謂「警察打死人」件事？再推演落去就更加好笑，大家諗下，咁每個月31號，一大班人去太子站拜祭「果啲」，又係咩呢？其實之前已經有媒體真實地訪問過幾個所謂喺8.31被打死嘅示威者，證明咗8.31根本無死人，依家呢班議員又間接承認呢個事實，算唔算係「鬼拍後尾枕」呢？
周梓樂死於衝突現場的「附近」
另外，如果大家認真推敲上述文字，仲會發現一個有趣地方，就係呢班盲反派同時證實咗，周梓樂係喪命於警民衝突嘅「現場附近」，重點在於：而唔係死於「警民衝突」、亦唔係「衝突現場」，照咁睇，周梓樂死亡事件根本無關警方事喎！之但係咁，大家又要諗清楚，過去幾月嚟，大班反政府人士借周梓樂事件指摘「警暴」、煽動抗爭，又係基於咩呢？
短短一段文字，帶出咁多重要訊息，廣男認為大家好應該多謝呢班盲反派議員，因為嚴格嚟講，呢八位聯名動議人，可以話係首批盲反派議員承認8.31太子站冇死人、周梓樂之死同警察執法無關。不過講到呢度，廣男越諗就越替果啲被捕學生、年輕人唔抵，大家諗下，有幾多後生仔就係因為信咗政客嘅謊言而去暴動、犯法，依家好啦，啲靠食「人血饅頭」上位嘅政客就坐收漁利薪高糧準，安安樂樂做議員，而班後生仔就可能要面臨牢獄之災甚至賠上前程，廣男都係果句，對住呢班盲反派，你越信得多，就越死得重！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論