黑暴席捲全港，數以千計學生涉嫌違法被捕，亦有教師竟涉嫌參與黑暴，甚至向學生散播仇恨言論，震驚全港。對於呢類「問題」教師嘅去留，好多都認為既然教師涉嫌違法或者有違專業操守，教育局以至學校就應該以學生福祉為依歸，革除「問題」教師，但社會聲音似乎未能促使教育局或學校採取果斷措施。最近，有社會團體要求教育局以「重大公眾利益為由」，公開違法、被捕或被處分教師嘅姓名同任教學校嘅名稱、仲有教育局嘅調查結果同跟進行動等，囍雨認為，要有效保護學生，最好方法莫過於俾家長、學生知道「問題」教師係邊個，喺邊度教緊書，等家長、學生自行決定係咪要退學或者轉校。
學生、家長是重要持分者
對於有聲音要求公開「問題」教師嘅資料，囍雨認為大家首先要諗一個問題，就係任何從事教育工作嘅人，都知道一切要以學生角度出發，以學生福祉為依歸，家長亦係當中好重要嘅持分者，有一定發言權同知情權；俾佢哋知道自己學校或者心儀學校有冇「問題」教師，其實係合情合理，因為如果佢哋知道某學校有「問題」教師，就可以考慮係咪仲要俾子女喺果度讀書。
其實只要用常理去諗下，就會知道學校有「問題」教師，會衍生啲咩問題。例如學校有涉嫌參與暴動嘅教師，佢哋會唔會將「違法達義」嘅思想灌輸俾學生呢？如果教師真係咁做，咁啲學生會唔會變成「衝衝子」，成為政客煽動暴力、對抗政府嘅「炮灰」？又或者，如果學校有散播仇恨、仇警言論嘅教師，佢哋又會點教學生？會唔會直接、間接將仇恨思想灌輸咗俾學生，埋下禍根？呢啲問題，對學生同家長，都係亟需關心嘅重要問題！
政客不會讓子女做暴徒
退一步講，就算有部分家長係支持或同情示威同反政府行動，佢哋係咪願意俾「問題」教師教導自己嘅子女，係另一回事。道理好簡單，好似啲政客成日支持黑暴、支持年輕暴徒咁，但佢哋係唔會俾自己子女去衝、去做暴徒；類似道理，家長們同情「問題」教師，都唔代表家長們想呢啲人教自己子女，因為始終會怕子女會被誤導一樣。
對於公開「問題」教師資料，事關學生福祉，囍雨希望教育局以公眾利益、學生未來作考量，諗清楚係咪要公開資料，一令家長有知情權，二則產生警示作用。
原圖：大公報
請Follow我們的YouTube頻道：
下載我們的手機應用程式，收看第一手精彩內容：
評論