因為有盲反派議員動議將兩個將軍澳休憩處以兩名「死者」命名，喺西貢區議會引發一場罵戰，本來「將軍澳民生關注組」陸平才同柯耀林以為自己提出「周梓樂、陳彥霖紀念公園」動議會好威威，點知連同路人都睇唔過眼，炮轟佢哋食「人血饅頭」，搞到要由主席提出暫停動議，最後仲投票通過埋。其實，呢班議員能夠進入議會，某程度上已經係食咗「人血饅頭」，依家仲想「食到盡」，難怪連自己人都忍唔住鬧佢哋啦！
盲反派議員被掟「饅頭」
本來囍雨以為，對於陸平才同柯耀林嘅冷血行為，最睇唔過眼嘅應該會係建制派，點知原來盲反派內部仲激，其中「將向天晴」議員葉子祈，仲準備咗一堆紅色饅頭（意為「人血饅頭」）倒落柯耀林張枱度，仲話佢哋無顧及死者家屬感受；其他盲反派議員，有啲就話陸、柯咁做會令死者家屬勾起傷心回憶，甚至批評佢哋嘅建議唔止係二次傷害，直頭係「N次傷害」。陸平才同柯耀林，今次抽政治水點知抽著「火水」，變成咗眾矢之的！
囍雨就覺得，就算唔講政治行為，盲反派議員提出呢啲動議，根本就係無人性！人哋嘅子女離世，本身已經非常傷痛，但竟然仲有盲反派議員喺無詢問過家人意願嘅情況下，提議用人哋已離世子女嘅名字嚟命名公園，難怪連其他盲反派都睇唔過眼，嚴厲批評陸平才同柯耀林。
命名事件所反映嘅，仲有盲反派借假新聞、假消息炒作政治嘅污糟手法，到今日依家用緊；以陳彥霖為例，警方係經過調查指佢死因無可疑，其母親亦講到明女兒有情緒問題，綜合各種證據，陳彥霖都唔係因「抗爭」或受「政治逼害」而死，囍雨真係想問下柯耀林，要公園命名做「陳彥霖紀念公園」，到底係紀念啲咩？紀念盲反派嘅假消息令人信以為真，「真」到要起個公園紀念佢？唔好玩啦！
離譜行為 陸續有來
除咗西貢區議會，喺荃灣區議會亦有議員想動議將某個荃灣休憩處命名為「十一人民抗暴紀念花園」，去年10月1日，有中五學生因為襲警而被警員開槍射傷；又係類似問題，提出動議嘅趙恩來，想紀念啲咩呢？紀念有暴徒襲警甚至想「殺警」？講真，依家嘅區議會，唔單止係政治角力場，直頭被盲反派變成一個個散播謊言同仇恨嘅場地，市民係咪要繼續噤聲容忍佢哋！
圖片來源：大公報
請Follow我們的YouTube頻道：
下載我們的手機應用程式，收看第一手精彩內容：
評論