呢排行街、出街，囍雨見到一個十幾年嚟都未見過嘅現象，就係街道上好多商舖拉閘「結業」，當中有唔少仲要係經營咗好多年嘅老字號，單單係行幾條街，囍雨已經充分感受到黑暴「攬炒」香港嘅威力；明明香港已經被黑暴搞到「遍體鱗傷」，但睇新聞，竟然仲有「黃店」好高調地聲稱「不招待中國人」，囍雨真心唔明白，呢啲商舖仲以為走「本土」路線，會喺黑暴「攬炒」風波中獨善其身？唔好天真啦！
內地客不想來香港！
有傳媒報道有位於中西區嘅店舖張貼告示稱「抗疫期間，為保障港人，殊不招待中国人」，呢種「抗拒」內地客嘅表現，秉承「黃色經濟圈」 既思想，令囍雨諗到幾個問題，店主表示喺呢段時間唔招待內地客，但係佢哋仲用唔用來自內地嘅東江水？用唔用來自內地嘅食材？從內地返港嘅香港人，佢哋係咪都唔招待？要同內地切割，就要連東江水都唔好用喎，咁店主係咪會截水先？其實要同內地切割，極難，除非店主撤出香港啦！
呢種「討好」本土派人士而「謝絕內地人」嘅想法，說穿了就係「黃色經濟圈」嘅一種體現。不過，囍雨想指出問題絕對唔係「我哋呢段持間唔招待內地人」或者「我哋專Serve本地客」咁簡單，而係就算你肯招待內地客，內地客根本都唔想嚟香港。囍雨呢排睇內地嘅社交媒體留言，有啲內地人講明有人想「攬炒」香港，由得香港人自己搞「黃色經濟圈」，有啲內地人表示除咗公幹絕對唔會嚟香港，或者未來十年都唔會嚟，免得俾人歧視。「暫時」唔招待內地客或者「專招待香港人」，講就好型，不過問題唔係你招待與否，而係人哋都唔想嚟！呢啲就係「莫道你在選擇人，人亦在選擇你」。
疫情過去 還有黑暴
有唔少香港人都有一種非常「良好」嘅意願，就係以為疫情過去，香港就自然會「康復」，但其實呢種想法大錯特錯，因為真正令香港經濟迅速下滑嘅原因或者根本原因，係因為黑暴肆虐咗香港大半年，令香港經濟極度疲弱；黑暴唔停，支持黑暴嘅政客傳媒唔收手，就算疫情聽日就過去都無用，所以香港喺2003年SARS後經濟迅速恢復嘅模式，唔可能再存在。有啲人公開「拒絕」內地客，絕對會令兩地矛盾更深，令其他香港人「死多兩錢重」。請呢班「本土主義者」，唔好替其他人「趕客」，麻煩晒！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論