最近，網上流傳一條片段相當有趣，一班暴徒喺旺角堵路聚集，而且列陣「步步推進」，突然因為一條「黃色欄杆」倒下，發出「嘭」一聲巨響，啲暴徒即刻嚇到「雞飛狗走」全員撤退，有人笑言原來「欄杆」好用過催淚彈，甚至有人笑言呢條「欄杆」值得攞個「諾貝爾和平獎」，要向「欄杆」敬禮；如果一條「欄杆」可以攞和平獎，咁和平獎嘅「門檻」真係相當低。呢頭講開和平獎，廣男日前睇民主黨立法會議員許智峯嘅社交平台，就見到佢稱有挪威國會議員已經提名香港人角逐諾貝爾和平獎；對於呢個「提名」，廣男充滿「黑人問號」，外國議員要提名香港人角逐和平獎，又唔知包唔包括一直喺香港「打砸搶燒」嘅暴徒呢？

只有警暴 沒有暴徒？

老實講，本港嘅盲反派政客向來喜歡勾結外國勢力，係一個不爭嘅事實，許智峯去到外國同外國政客會面，稱「Guri Melby（挪威國會議員）向我確認已提交香港人角逐諾貝爾和平獎提名」、「感謝Guri Melby一直關注香港人權狀況，為香港人向國際發聲。挪威一直是捍衛人權與言論自由的表表者，暴政當前，國際之間更要保持連結」，廣男真係唔明白，挪威人捍衛人權同言論自由等等，咁挪威人捍唔捍衛香港暴徒「打砸搶燒」嘅行為呢？佢哋有議員要提名香港人去攞和平獎，所謂「香港人」，到底包括咩人？

平心而論，如果有外國政客要提名「香港人」（要講明只包括和平示威、表達訴求嘅香港人）去攞獎，廣男覺得件事都未算離譜；但如果只係籠統地表示要提名「香港人」，廣男就覺得大有問題喇，因為香港示威者當中，有唔少人其實係「打砸搶燒」嘅暴徒，對住無辜嘅香港人，佢哋打、燒甚至用磚頭殺人，係真係殺死咗人果隻；對住店舖、商號，佢哋稍稍唔鍾意就打爛、火燒人哋店舖，大家應該問下提名「香港人」果位挪威議員，佢提名嘅「香港人」，包唔包括激進示威者或者暴徒，如果只係包括和平示威者而摒棄暴徒，即係「反暴力、反暴徒」，咁佢哋「曲線」（反暴力，保法治）就要講明喎！

勿聽信盲反派讒言

有外國政客認為香港爭取「自由、民主」，甚至值得攞和平獎，廣男覺得當中可能有兩大原因，一係佢哋就俾香港盲反派政客誤導，以為香港嘅示威「好和平」；一係佢哋就有其他政治計算，包括想借機打擊中國；又或者，兩個原因都有。但無論如何，暴徒如果被提名角逐和平獎，好抱歉，呢個對「和平獎」而言，實在係一大諷刺！ 

圖片來源：RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app