盲反派政客做嘢，好多時先諗咗言行嘅「效果」，然後再諗言行嘅「後果」，好似社民連秘書長吳文遠咁，幾年前透過傳媒同社交媒體，披露廉署調查時任民政事務局常任秘書長馮程淑儀，前年被裁定三項披露調查人身份罪成，判監四個月；吳文遠一直就事件上訴，終院日前駁回吳文遠嘅上訴申請，佢要即時收押，坐埋餘下嘅三十一日刑期。廣男就認為，吳文遠「最終罪成」，除咗係法庭彰顯公義之外，呢單案對社會尤其係盲反派政客，都有極大啟示！
政客也不能以身試法
對於吳文遠最終上訴失敗，法庭嘅裁決為社會帶嚟一個極度重要嘅訊息，就係無論你係咩人、咩事都好，都唔可以隨便披露廉署調查資訊，相關法例唔係為「存在而存在」，而係有好實則嘅需要；例如廉署查緊一單案，如果其中一個投訴人「周圍唱」，咁被調查嘅人會唔會毁滅證據令廉署查唔到嘢？又或者，如果被調查對象其實係無辜嘅，但未查完、外界「唔知咩事」就俾投訴人「唱通街」，咁咪毁咗被調查人嘅聲譽？所以《防止賄賂條例》要求保密受調查人身份等資料，係絕對有必要！
吳文遠刻意披露資料，我哋可以睇到兩個問題，第一就係政客刻意披露廉署調查資料，任何明理嘅人包括司法人員都唔會相信政客咁做係為咗「公眾利益」，而只會認為啲政客披露廉署資料係為咗提高個人名氣！第二，無論係政客好、議員也好，如果觸犯相關法例，好抱歉，執法部門都要拘捕同檢控佢哋；否則，個個都話自己有咩「理由」而隨便披露廉署調查資料，咁廉署以後仲可以點查案？今日吳文遠入獄，就係盲反派用嚟自省嘅「一面鏡子」。
會調查林卓廷嗎？
其實，盲反派入面披露廉署資料例如受調查人士身份嘅，又點會得吳文遠一個；前排民主黨立法會議員林卓廷就公開喺一個記者會上面，高調宣稱某位警員正俾廉署「查緊」；廣男就喺度諗，如果吳文遠要被捕、被檢控同被判罪成入獄，咁林卓廷係咪都相當有罪嫌？佢作為「前廉署調查員」，如果真係有罪，又會唔會係知法犯法、罪加一等？倘若林卓廷被捕，廣男只可以講一句，「我最期待嘅畫面出現喇」！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論