因為涉嫌刑事恐嚇同參與未經批准集結，《生果報》老闆黎智英終於「落網」，日前被警方正式拘捕及起訴。對於涉嫌犯法嘅人，警方執法可以話係應有之義，但外界尤其係「關照」開黎智英嘅外國勢力或台灣勢力，似乎就對事件「相當緊張」，美國參議員、英國上議員、前港督彭定康甚至台灣外交部，都紛紛為黎智英「發聲」。對於佢哋力挺黎智英，囍雨覺得問題重點只有一個，就係即使黎智英係傳媒老闆、盲反派「金主」以至黑暴運動「大台」，係咪因為佢嘅「特殊身份」，所以涉嫌犯法都唔可以拉、唔可以告先？
重點：黎智英有沒有犯法
一眾外國勢力或者台灣勢力聲援黎智英嘅「理由」多多，有啲話拘捕行動企圖令「民主聲音滅聲」，有啲話拘捕對「一國兩制」係嚴重挫敗，有啲甚至將拘捕及起訴行動同香港自治狀況拉上關係。囍雨就覺得，問題其實無咁複雜，重點只在於黎智英到底有冇犯法，有冇破壞法治；外國、台灣勢力意圖借輿論力量攻訐執法嘅警方以至政府，其實破壞法治嘅，係呢啲政要、政客先真！
囍雨綜觀由《生果報》自己報道嘅外國、台灣政要或者政客嘅言論，呢啲國家或者地區都聲稱自己係法治之地，囍雨真係要商榷一下，係咪喺美國、英國或者台灣，傳媒老闆或者受政要「關照」嘅人，如果參與未經批准集結，會因為佢嘅身份而不受拘捕同檢控？如果有人出言恐嚇，係咪又會被「放生」？如果唔係嘅話，咁香港警方拘捕黎智英有咩問題？囍雨就覺得，如果喺無罪嫌、無罪名嘅情況下拘捕黎智英，咁就令人難以接受，但依家涉嫌犯罪嘅時間、人物、地點同內容都有齊，警方如果唔拉人，咁對其他人就真係唔公平。
盲反派的大腦、金主、黨鞭和喉舌
黎智英作為盲反派嘅「大腦、金主、黨鞭和喉舌」，好多人都對佢被捕感到「震驚」，囍雨認為最正確嘅描述，應該話係「遲來的公義」先真。見到黎智英呢個賣國賣港嘅人被拘捕，囍雨就喺度諗，同黎智英一同參與過唔同「集結」嘅盲反派政客，係咪都會相繼「落網」呢？套用警隊「一哥」鄧炳強所講，唔理涉嫌違法嘅人幾財雄勢大，有幾大影響力，影響到媒體都好，犯法就係犯法，就要拉！今日黎智英被捕，但願只係伸張正義嘅開始，其他「違法達義」嘅人，之後都會被繩之於法！
請Follow我們的YouTube頻道：
下載我們的手機應用程式，收看第一手精彩內容：
評論