由黎智英「打骰」嘅壹傳媒集團越做越唔掂，上星期先宣布旗下台灣《壹週刊》將會喺月底全面「執笠」，最近又有傳媒引述消息話，就連集團旗下嘅《生果報》都要向員工「開刀」，壹傳媒工會話收到同事求助，至少21名營業和市場部的員工被裁員。廣男衰啲都要講句，《生果報》平時咁撐黑暴、宣揚「攬炒」，又幾乎日日幫暴徒寫歌頌故仔，結果「攬炒」浪潮一到，唔單止打工仔、企業老闆、法律界人士被「炒起」，就連自己都「炒埋一碟」，都可算係「得償所願」囉。
炒作黑暴亦無法刺激業績
其實睇番壹傳媒過去幾年嘅業績，講真都幾「得人驚」，由2015/16年度蝕3億幾，去到2018/19年度都仲係蝕緊錢。廣男本來以為，自舊年修例風波開始，《生果報》不斷寫黑暴故仔，例如「火魔法師」（縱火暴徒）、「攬炒巴」（眾籌登報要求制裁香港嘅網民）等一個個「盪氣迴腸嘅故事」，然之後又「成功推出」一批又一批「衝衝子」，加埋黑暴「攬炒」日趨成形，《生果報》必定深得反政府人士支持；再加上舊年靠住揭藝人私隱大肆報道「安心」事件，吸納咗唔少訂閱者，咁多「必然因素」之下，《生果報》一定好掂啦～～點知…實情似乎「不似預期」，依家仲連自己都「攬炒」埋添！
一個「時代的終結」？
廣男覺得，《生果報》嘅情況其實就同法律界依家無工開一樣，都係「自己整死自己」。想當初，部分法律界人士包庇黑暴、甚至「同行」，睇住基層市民、打工仔被「攬炒」，佢哋唔出聲，好啦，結果就搞到引火燒身，依家仲要向政府求助度「寒冬」；仲有，今早黎智英被警方上門拘捕，涉嫌參與「未經批准集結」同「刑事恐嚇」，隨住「禍港四人幫」之一的黎智英被捕被起訴，廣男就諗，呢個係咪可以話代表住一個「時代嘅終結」？講真，呢一刻廣男唔知道，但幾可肯定嘅係，《生果報》自招惡果！
講真，廣男一向覺得，「錢可以解決嘅問都唔係咩大問題」，香港依家經濟差、有「金錢損失」都唔係咩「大問題」，只要日後社會回復平靜，大家齊心、專心發展經濟，日子總會慢慢好番，更何況，香港唔係冇經歷過「大風浪」，冇嘢係通過團結、齊心解決唔到，但廣男擔心，依家最慘嘅，係無數年輕人因為信咗《生果報》嗰套「抗爭」理念，參與黑暴而賠上前程，而且時至今日都依然有人「追隨攬炒」，一方面繼續「搞死」香港，一方面就連自己都返唔到轉頭，其實有咁嘅結果，廣男真心覺得，就算今日《蘋果》就此「執笠」，都唔足以彌補佢犯下嘅「罪」！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論