以前讀書，較為活躍嘅同學一定會上堂傾計，而且仲係「細聲講，大聲笑」，唔知喺度講緊咩無關學習嘅嘢，當老師問叫呢啲同學唔好再傾計嘅時候，梗有同學話自己同隔離傾緊老師上課嘅嘢，老師會唔會信？梗係唔會啦，乜有學生討論中英數歷史等科目，會細聲講、大聲笑，仲要講唔停？呢啲連一般老師都呃唔到嘅「把戲」，今日竟然呃到學校管理層！擺明用「藏頭詩」咒警察「死全家」嘅孔聖堂中學署理副校長何栢欣，竟然「被相信無心」而獲放生，無得Acting做副校長，但可以回復教學工作。廣男真心想問下孔聖堂中學啲校董會同管理層，呢啲咁低層次嘅解釋，你哋真係信？咁快就查完，查咗啲乜？係咪侮辱全港市民嘅智慧？
失智的學校管理層
廣男無意貶低任何教育界人士，但孔聖堂中學相信何栢欣嘅解釋，真係令人摸不著頭腦。廣男想問下校方校董、管理層，見唔見到何柏欣喺社交平台分享嘅仇警「藏頭詩」，文末有寫上「明嘅就明」、「大家冷靜啲 睇清楚就知」，明明有文字意指內文有「特別意思」、「明嘅就明」，叫人「睇清楚」，校方信何栢欣無心？如果佢唔識字，廣男就信佢「無心」！
依家嘅情況，俾人感覺就係仇警教師「講大話」，校方就為免麻煩願意「受騙」，咁就大家都「好做」，但校方呢個做法，既侮辱家長同學生嘅智慧，又侮辱緊市民嘅智慧。廣男想講，就算退一億步，何栢欣真係唔知段文內文辱警，但段文連初中生都睇得出有問題，但作為受過高等教育嘅教師「睇唔出」，咁低水平都可以喺你學校教書呀？咁嘅教師會教出咩學生？係教出超低水準嘅學生，定係教出專係「無心地做壞事」嘅學生？成間學校嘅校董會、管理層，每人睇篇嘢一次，再問下自己，有邊個睇唔出段內文辱警好嗎？有啲嘢，係Common Sense，係中學生都能夠發現有問題嘅Sense。
何栢欣聲明欠了甚麼？
仲有一個耐人尋味嘅地方，就係今日有報道登出何栢欣嘅聲明，何栢欣嘅聲明同學校嘅唔同，第一佢無向佢詛咒嘅警察道歉；第二，佢知自己有錯「深表歉意」，但無講自己會為錯誤負咩責任？一個教師公開辱警、咒警，原來唔駛親自向警方道歉，又唔駛負咩實質責任。教育界人士辱警嘅懲罰「咁輕手」，啲人梗係繼續嚟啦！
圖片來源：文匯報
請Follow我們的YouTube頻道：
下載我們的手機應用程式，收看第一手精彩內容：
評論