1財爺陳茂波宣布派錢，18歲或以上每人一萬元，好多人都覺得滿意；其實，所謂「派錢」、「派糖」，最深層原因都係因為香港經歷大半年黑暴運動，令香港「身受重傷」，新冠肺炎出現，只係令「攬炒」步伐加快。所以，大家唔好以為疫情過後，香港就會雨過天晴，只要黑暴再度活躍起嚟，就算政府派多兩次錢，香港一樣無運行，財爺派錢係短暫救火，我哋唔好再俾黑暴「攬炒」，先係關鍵所在！
打砸搶燒 打傷香港
喺過去幾個月嘅黑暴運動，有暴徒堵路，有暴徒阻礙鐵路運作，有暴徒「圍毆」途人，有暴徒甚至連旅客都打，仲有好多商店、銀行以至餐廳被打到「溶溶爛爛」，暴徒甚至連大學都唔放過，將大學變成汽油彈「兵工廠」、「戰場」、「練習場」。黑暴猶如癌症，令香港嘅「底子」大大削弱，「身子差」嘅香港再遇上肺炎，自然就更加傷；如果有人以為只要捱過疫情，「一切就會好轉」，咁樣就未免太樂觀喇。
囍雨認為，大家一定要認清黑暴對香港嘅實質影響，包括對外同對內嘅影響。對外，內地旅客、外國旅客見到香港暴徒連旅客都侮辱同暴打，仲點會嚟？唔通貼錢嚟香港，然後「搏打」？內地、外國投資者要投資，香港仲會係理想城市？相信唔會囉！對內，好多行業已經俾暴徒打到「體無完膚」，旅遊業、酒店業、飲食業、零售業、運輸業以至工程界都「奄奄一息」，呢啲行業唔會因為疫情過去而「自動康復」，只會繼續吊鹽水，以上行業嘅失業率「節節上升」，都係多得黑暴！
派錢「幫到一時」 慎防黑暴再來
所以對於政府派錢，大家真係要明白，一萬元以至其他紓困措施，幫到大家一時，幫唔到大家幾耐。以一個中產家庭計算，當佢哋喺派錢、退稅、退差餉等等可以「袋」三、五萬元，但如果佢哋公司結業、佢哋飯碗不保，單單係一個月嘅人工，都可以無三、五萬元；咁要點先可以治本？好簡單，要求黑暴人士同煽動佢哋嘅政客，唔好再作出任何破壞香港嘅行為，尤其係打砸搶燒嘅黑暴行為！之前因為有地區診所被定為「指定診所」，即刻有暴徒去放火，又有人堵路，可以預計得到，當疫情過去，好可能就係黑暴再度活躍之時，所有關心香港經濟、民生嘅市民，都不可不察。
2003年SARS後，香港因為有中央政策支持而經濟迅速反彈，但呢支歌仔，恐怕今次無效喇，因為肯嚟香港俾錢香港人賺嘅人，將會大大減少；港人要自救，各方人士必先同攬炒香港嘅暴力割席，嚴正要求政客、暴徒，唔好再盲撐黑暴打爛香港！
圖片來源：網絡圖片
請Follow我們的YouTube頻道：
下載我們的手機應用程式，收看第一手精彩內容：
評論