孔聖堂中學署理副校長何栢欣因為喺社交平台發表辱警、仇警嘅言論，引發社會各方人士猛烈批評；校方將何栢欣停職，表示暫時相信佢係「無心之失」，而向來「縱暴」、「縱容仇警」嘅教協，就對外宣稱「據了解何栢欣涉事帖文並非其原創，他轉貼時只贊同字面表達的意思，沒留意當中另有含意」。對於呢種詭辯式嘅回應大家相唔相信？如果只係如校方或者教協所形容嘅「無心之失」，點解當事人唔出嚟交代同道歉呢？

「藏頭詩」辱警 罪證確鑿

同其他仇警教師例如賴得鐘、戴健暉唔同，何栢欣嘅辱警方式，係喺社交平台貼一篇表面上「同情」警察，實則用「藏頭詩」嚟表達辱警、仇警情緒，而所謂「藏頭詩」加埋，整句句子就係「黑警死全家 一個都不能少」。堂堂一個副校長，會睇唔出段文字係仇警，而「無知」地轉貼咗？如果真係咁，佢嘅水平都「好高」喎！

呢件事實情係點，除咗何栢欣，可以話係「無人知」，因為大家依家要考究嘅，係何栢欣轉貼仇警內容時，佢嘅「心」到底諗緊啲乜，即係對於追究佢發表仇警言論單嘢，可以話校方以至教育局，「只可以」選擇信與唔信，如果相信佢係「無心之失」，咁大家都無乜好講。不過，囍雨覺得退一萬步講，當何栢欣真係「無心之失」，咁係咪「無心」就唔駛負責任呢？就算真係「無心」，但傷害已經造成，佢唔駛公開交代事件？唔駛公開向警方道歉？又駛唔駛引咎辭職？如果等件事丟淡「當無事」，咁以後「無心之失」會唔會成為教育界人士仇警嘅新「藉口」？

其實呢件事，大家仲可以用另一角度去分析，就係何栢欣根本就係有心辱警，只係件事揚咗出去，無論係佢本人抑或教協，都費煞思量幫佢諗計仔砌詞狡辯，最後諗到一招，就係「無心轉貼」、「無心之失」，咁就乜都「唔關佢事」喇！如果件事真係咁，咁教協包庇「仇警」教師嘅功力，真係「更上一層樓」！

聽其言 觀其行

據傳媒報道，校方已經成立專責調查小組查何栢欣辱警呢單嘢，喺呢度，囍雨有個小小嘅建議，就係校方應該將何栢欣近一年嘅社交平台紀錄、公開發言全部審視一次；如果佢一向仇警，但今次突然咁「同情」警察，大家都會知道件事根本有「古怪」！ 其實，連教育局局長楊潤雄都講明教師喺私人時間都唔應該有侮辱性、仇恨性言論，教師亦唔應該由其他組織「代言」，即係話無論係何栢欣嘅仇恨言論，以至佢搵教協「代言」嘅做法，都相當值得商榷，甚至追究。

原圖：網絡

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app