一場疫症，人性盡現，有醫護人員緊守崗位，勞心勞力救治病人，亦有政客借機出嚟搞事、「抽政治水」，就好似公民黨立法會議員郭家麒，指控警方囤積防疫裝備，之後香港警察隊員佐級協會發聲明回應，批評有關言論「指控失實」，但係郭家麒唔單止無正面回應質疑，仲要喺社交網站發文鬧返協會同警隊轉頭，又不斷出言侮辱，話對方「無水平」云云。廣男想講，事件關鍵係郭家麒批評警隊之前根本就無查證過，所謂「囤積」裝備根本就唔係事實！「老屈」完警隊仲要唔肯認錯？
郭家麒指控失實
對於郭家麒嘅指控，其實警方已經澄清過，以外科口罩為例，警隊目前只係得一星期用量嘅存貨，唔夠用先會再向物流署申請攞物資，大部分前線警員每日只獲發一個口罩，而保護衣更加係一直用緊儲備，至今都無申領過一件，咁仲點算係「囤積」裝備先？而且警方經常要喺高風險環境工作，好似押解犯人去急症室、喺病房長時間看守犯人之類，警員都要有妥善裝備保護好自己，唔係點樣去保護市民？郭家麒嘅講法根本就係「老屈」，存心分化警民關係！
不願認錯 一味轉移視線
廣男覺得，如果郭家麒認為自己無錯，可以攞證據出嚟，等大家理性討論，但係佢又唔回應任何指控，只係一味繼續攻擊其他人，咁樣擺明係畀人講中咗，想惡人先告狀喎！不過廣男都已經見怪不怪，呢種其實係盲反法嘅慣用伎倆，明知自己理虧，無辦法自圓其說，就轉移視線講其他話題，甚至故意挑起其他「火頭」，等大家唔好再追究落去，呢種「遮醜」方式，就算郭家麒唔厭，大家都睇到厭啦！
其實唔單止轉移視線，郭家麒仲經常人身攻擊，去侮辱政敵同睇唔順眼嘅人，上月立法會財務委員會，就多次出言侮辱財委會主席陳健波，最終被逐出會議廳；仲有去年5月，網上熱播一條國歌「快閃」短片，其中一幕有一位坐輪椅嘅婆婆，一聽到國歌奏起就企咗起身，以示對國歌嘅尊重，郭家麒竟然話婆婆好像「神打上身一樣」，歪曲事實話係「逼老人家站立」，借題發揮嚟抹黑國歌法，郭家麒為達政治目的，不惜侮辱他人，品德行為低劣，還配做立法會議員嗎？
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論