港台節目《頭條新聞》出現「辱警」環節引嚟唔少評論狠批，連香港資深傳媒人聯誼會「香港電台節目關注組」都公開刊登譴責文章批評，指節目「捏造謠言，歪曲事實」。廣男留意到，原來「香港電台節目製作人員工會」（下稱「港台工會」）日前亦有回應事件，佢哋聲稱警隊針對該台，「出言打壓」，「嚴正要求警隊尊重港台專業及編輯自主，着眼點應落在維護公眾利益之上」；對於呢種回應，廣男實在質疑，傳媒係咪因為有「編輯自主」就大晒，可以罔顧事實，作出不實指控，以至煽動仇恨呢？
編輯自主不等於為所欲為
對於外界對傳媒嘅種種批評（先撇除港台係公營廣播機構呢個問題），啲傳媒好多時都話自己有「新聞自由」、「編輯自主」做擋箭牌，不過廣男覺得呢種說法，其實係有誤導成分嘅，點解咁講？好簡單，媒體有「編輯自主」，代唔代表媒體可以發表散播、煽動仇恨嘅言論？代唔代表媒體可以發表種族、性別歧視言論？代唔代表媒體可以煽動違法行為？代唔代表媒體可以危及國家安全、社會穩定？代唔代表媒體可以誹謗？代唔代表媒體可以做「假新聞」？如果大家諗下以上問題，都會知道有「新聞自由」、「編輯自主」絕對唔代表媒體可以為所欲為！
今次《頭條新聞》嘅問題，在於佢作出指控根本唔係基於事實，因為隱喻警隊「裝備多」、「唔駛點做」等等，都係假嘅！警方清楚澄清，口罩存量得返一星期左右，甚至一件保護衣都無喺疫情之後獲得派發；好明顯，《頭條新聞》、王喜作出「嬉笑怒罵」嘅事實基礎都唔存在，呢啲失實甚至有誹謗成分嘅言論，又點會係一句「編輯自主」就可以當為辯解呢？港台、港台工會與其喺度狡辯，不如勇敢啲承認錯誤，承擔責任仲好啦！
應帶頭拒絕假新聞
至於港台工會提及到嘅公眾利益，公眾利益點定義，確實係人言人殊，但廣男又想問一個問題，如果有媒體以不實嘅評論，喺度散播、煽動仇恨執法人員，咁到底放任佢哋係公眾利益，定係嚴肅處理呢啲媒體人員以至管理層，先至維護到公眾利益呢？廣男真心覺得，港台工會搬出「公眾利益」呢啲字眼，同黑暴嘅政治口號，感覺如出一轍；不過，有幾動聽嘅口號、宣言都好，都唔代表港台、港台工會可以合理化《頭條新聞》嘅不實評論，所以請佢哋唔好再喺度掩飾！
其實，港台同一般媒體有一個唔同嘅地方，就係它本身係一個公營廣播機構同電視台，作為媒體嘅「示範」或者表率，佢應該比一般媒體更加尊重事實、帶頭拒絕假新聞先啱。但依家港台節目嘅內容，反映佢哋根本就係喺度濫用緊新聞自由，甚至誹謗！大家應該一同譴責港台，向媒體歪風說不，更要向「誹謗」、假新聞說不！
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論