相信好多80後，同廣男一樣都睇過大台套《烈火雄心》，飾演劇中男主角嘅王喜，係一個正直、勤奮而且有捨己救人精神嘅消防員，佢嘅「正氣形象」亦因為呢套劇而深入民心；不過時移勢易，今日嘅王喜，已經變成100%嘅仇警分子，佢最近仲喺港台節目「粉墨登場」，喺個垃圾桶走出嚟扮警察、抹黑警察，令警方令高調回應事件，批評節目顛倒是非，漠視警方喺抗疫期間工作嘅努力，做法難以接受。廣男就覺得，港台節目嘅問題，唔在於咩「嬉笑怒罵」，而係作出評論前，根本就唔係基於事實！
「嬉笑怒罵」不能失實
喺港台節目《頭條新聞》入面，王喜「扮演」警員，多次以嘲諷方式抹黑警方，甚至隱喻警隊積存大量抗疫裝備，廣男必須講，王喜所「嘲諷」嘅嘢，根本就唔係事實！因為據警方表示，外界嘅指控係錯誤、失實，以外科口罩為例，警隊只係剩返一星期用量，每星期都會檢視口罩用量及存貨，再向物流署申請供應；至於保護衣，警方更喺疫情至今，一件都未領取過，現時所用嘅保護衣，係警方嘅內部儲備。至於影射警方「唔做嘢」嘅說法，亦明顯唔係事實，因為警方除咗幫手抗疫之外，亦有組成義工隊看守口岸、檢疫中心等等。換句話說，一啲嘲諷警方裝多、「唔做嘢」嘅說法，絕對可以話係老屈！
對於時事評論節目以「嬉笑怒罵」形式諷刺時弊，完全無問題；不過港台、王喜嘅節目內容，唔係話「串下政府、警察」咁簡單，而係佢哋作出「戲謔」嘅基礎，根本唔係事實！講到警察好多裝備咁，但人哋啲口罩存貨得番一星期，保護衣甚至最近一件都無攞過；串人哋做嘢「HEA」，但人哋協助抗疫又成立義工隊，到底係港台唔知咩事，定係佢哋明知咩事，但都係借機攻訐警察呢？
港台管理層應負責任 警應追究
老實講，港台借諷刺時弊針對政府，絕對唔係第一次；廣男極為好奇，點解一個公營電台，一直拿公帑攻擊政府、警方，甚至係抹黑警方，都好似完全無問題，無人追究，無人問責，又無人要為事件負責任嘅呢？係咪打住「新聞自由」嘅旗幟，港台就可以為所欲為？喺呢件事上面，廣男唔排除有人已經涉及發表誹謗言論，警方要以正視聽，絕對可以考慮從法律途徑追究。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論