之前一場黑暴運動，大家都睇清楚好多政客嘅真面目，好多所謂「為香港好」嘅政客，原來都係想香港亂，想政府冧；依家疫症擴散，啲政客所想嘅，當然好多都仲係借機對抗政府、警察，散播仇恨啦！例如工黨，就喺社交平台聲稱根據《基本法》第154條等，衞生署有權叫警察去隔離營「當更」；而公民黨立法會議員郭家麒，就指控警方囤積口罩等防疫裝備云云。講咁多嘢，甚至係講假嘅嘢為咩？為嘅就係挑撥警民矛盾，原來喺抗疫時刻，香港一班盲反派始終記掛嘅，都係點樣反政府，點樣散播仇恨，令到更多人一齊攻訐警方。
工黨亂講《基本法》
對於工黨在社交平台稱根據《基本法》第154條衞生署可以要求警方「做這做那」，囍雨只能夠用摸不著頭腦去形容，因為囍雨睇勻整本《基本法》，相關條文係講緊國家授權特區簽發特區護照或者其他旅行證件，同埋特區政府可以實行嘅出入境管制問題，到底關衞生署咩事呢？囍雨實在充滿「黑人問號」！囍雨大膽猜測，工黨之所以無端端「老作」《基本法》嘅解釋，根本只係借機挑撥矛盾，令人覺得警察喺抗疫時「應該做啲乜」，警方唔做就是逃避。
至於郭家麒，佢質疑警方有囤積裝備之嫌，其實又係一場毫無根據嘅「老屈」行動。講口罩，警方已經得返大約只有一星期嘅存貨，完全唔可以用「囤積」嚟形容；講保護衣，由疫情爆發至今，警隊更係無獲發過任何保護衣物，用緊嘅都係警隊嘅儲備。喺呢個情況下，何來「囤積」呢郭議員？
議員不查證 為抹黑亂講！
無論係工黨抑或郭家麒，其實佢哋最大嘅問題，就係作出指控之前，連法例點講、事實係點都未搞清楚。老實講，唔好話作為政界人士，就算係普通人都睇得出，相關《基本法》完全唔關衞生署或者警方事，工黨咁「屈」法，同「看圖作文」無分別；至於郭家麒就更離譜，作為議員，完全唔查證就喺度「老屈」警察，如果做立法會議員都憑「感覺」、「聽聞」做嘢或者作出指控，咁就真係十分危險！囍雨喺度提下大家，上年八月黑暴運動肆虐香港，郭家麒仲敢講運動至今「無打爛一隻窗、冇影響任何一個途人、何來嚴重財產及人命損傷？」，由此可見，條友為咗政治，真係咩歪理都講得出口！
或者大家覺得好奇，點解啲政黨、政客，喺呢個抗疫時刻仲要喺度煽動對立，仲要攞警察嚟同醫護作比較，當中原因其實好簡單，就係佢哋由頭到尾，都只係喺度諗點樣打擊政府、警察，抗疫係次要，甚至「唔重要」！囍雨調返轉咁講，啲人成日話醫護要裝備足夠等等，咁警察難道又唔駛裝備抗疫？反政府人士嘅雙重標準，永遠都係咁令人反感！事實擺在眼前，郭家麒的確作出失實指控，警方絕對可以考慮採取更多行動，包括研究下郭家麒言論有冇涉及誹謗，保留追究佢嘅權利！
圖片來源：RTHK
請Follow我們的YouTube頻道：
下載我們的手機應用程式，收看第一手精彩內容：
評論